Më 28 janar miratohet në Kuvend marrëveshja me Pfizer për vaksinën e COVID
Kuvendi do të nisë sesionin e ri parlamentar pasditen e 18 janarit, por duke vijuar respektimin e protokollit të masave anti- COVID. Ky vit elektoral pritet të kufizojë jetën parlamentare, pasi deputetët e mazhorancës dhe të pakicës do të fokusohen te fushata elektorale. Konferenca e Kryetarëve ka miratuar kalendarin 3- javor, në të cilën është përfshirë edhe paketa anti- shpifje. Në këtë takim online është vendosur që të bëhet kujdes me ligjet apo nismat që do të sillen në Kuvend, pasi nuk duhet të bien ndesh me ndalimet që i kushtëzon Kodi Zgjedhor. Në 28 janar dhe në 4 shkurt do të jenë dy seancat e tjera të radhës të parlamentit. Në mbledhje u diskutua edhe për ndalesat në Kodin Zgjedhor dhe u vendos që të zbatohet legjislacioni përkatës. Gjatë këtij sesioni, mbledhjet e komisioneve do të vazhdojnë të zhvillohen online dhe seancat plenare do të zhvillohen me praninë fizike të deputetëve, duke respektuar protokollet e sigurisë për mbrojtjen nga pandemia COVID- 19. Ndërsa më 28 janar, Kuvendi i Shqipërisë pritet të miratojë marrëveshjen me Pfizer për dozat e vaksinës anti- COVID. Këshilli i Ministrave e ka depozituar në 12.01.2021 këtë kërkesë në Kuvend, pra, një ditë pasi erdhën dhe u bë vaksinimi i parë në vend, në ambientet e stadiumit “Air Albania”. “Akti normativ nr. 1, datë 10.1.2021 “Për miratimin e tekstit të marrëveshjes, për prodhimin dhe furnizimin, nga dhe ndërmjet Pfizer Export B. V., dhe Ministrisë së Shëndetësisë dhe Mbrojtjes Sociale të Shqipërisë, Institutit të Shëndetit Publik, dhe ministrit të Shtetit për Rindërtimin, Autorizimin e procedurës për lejimin e hyrjes dhe administrimit të vaksinave anti- COVID- 19 në Republikën e Shqipërisë si dhe përdorimin e tyre në popullatë”, thuhet në njoftimin e Kuvendit.