Arrestohet sanitarja Tire Alldervishi, i zhvati 8 milionë lekë qytetares e ia la nënën të vdiste
Policia e Tiranës: Nën hetim për korrupsion edhe 4 persona të tjerë
Policia e Tiranës ka vënë në pranga sani taren e Sanatoriumit, Tire Alldervishi, e cila i mori plot 8 milionë lekë një qytetareje me pretekstin që do kujdesej për nënën e saj të shtruar në spital. Sanitarja është paraqitur si infermiere te shtetasja E. S. dhe i ka premtuar që do ia shpëtonte të ëmën 55- vjeçare, duke i kërkuar para çdo ditë përkundrejt shërbimit, një shërbim që e sëmura nuk e mori siç duhet, madje kishte mbetur edhe pa ushqim. Fatkeqësisht 55- vjeçarja nuk mundi të mbijetonte. Pas denoncimit të bërë në emisionin investigativ "Stop", 58- vjeçarja Alldervishi është arrestuar dje nga Policia e Tiranës, ndërkohë, nën hetim janë edhe 4 persona të tjerë në këtë spital, të dyshuar për korrupsion. "Specialistët e Seksionit për Hetimin e Korrupsionit bënë ndalimin e shtetases T. A., 58 vjeçe, banuese në Tiranë. Kjo shtetase i është prezantuar si infermiere shtetases E. S., 30 vjeçe, e cila ka kallëzuar se gjatë muajit dhjetor, kur nëna e saj ka qenë e shtruar në spital, shtetasja T. A. e ka mashtruar duke i marrë rregullisht shuma monetare nga 5.000- 6.000 lekë. Vijojnë hetimet për identifikimin e personave të tjerë të implikuar në këtë veprimtari kriminale", thuhet në njoftimin e policisë.
REAGIMI I SPITALIT
Pas skandalit të denoncuar në media, Spitali Universitar "Shefqet Ndroqi", i cili prej muajsh është shndërruar në spital COVID, e ka dënuar ashpër ngjarjen, duke e cilësuar sjelljen e sanitares si çnjerëzore. Në reagim spitali ka shtuar se puna e personelit shëndetësor nuk mund të njolloset nga ky akt i shëmtuar dhe ka kërkuar më tej nga autoritetet që të kryejnë hetimin e rastit deri në fund. "Gjithë personeli shëndetësor i spitalit ' Shefqet Ndroqi' ndihet tejet i lënduar, i befasuar nga veprimi korruptiv, çnjerëzor i sanitares me inicialet T. A., dhe dënon me forcë këtë akt të paligjshëm, korruptiv, të bërë publik në emisionin investigativ ' STOP'. Ky akt i shëmtuar dhe i papërgjegjshëm nuk mundet kurrsesi të njollosë punën vetëmohuese dhe të jashtëzakonshme të personelit shëndetësor të spitalit ' Shefqet Ndroqi'. Personeli shëndetësor i spitalit, duke u distancuar nga ky veprim, do të vazhdojë të ofrojë me përkushtim shërbimin shëndetësor në kohë dhe me cilësi. Mbas shkarkimit nga puna të sanitares, u kërkojmë autoriteteve kompetente të kryejnë hetimin deri në fund të këtij rasti. Personeli i shërbimit shëndetësor ' Shefqet Ndroqi'", thuhet në reagimin e spitalit "Shefqet Ndroqi".
REAGIMI I PROKURORISË
Edhe Prokuroria e Tiranës ka reaguar pas ngjarjes skandaloze në COVID2. Prokuroria pranë Gjykatës së Shkallës së Parë Tiranë ka regjistruar P. p. nr. 281, datë 13.01.2021, në ngarkim të shtetases Tire Alldervishi, për kryerjen e veprës penale të "Mashtrimit", të parashikuar nga nenet 143/ 2 të Kodit Penal. Sipas Prokurorisë, "shtetasja Eltjana Sinanaj ka bërë kallëzim penal ndaj shtetases Tire Alldervishi, e datëlindjes 15.03.1962, pasi sipas saj, i ka marrë disa shuma parash të konsiderueshme për t'i shërbyer mamasë së kallëzueses, e cila ishte e shtruar në spital me COVID- 19, duke iu prezantuar si infermiere, ndërkohë që ishte sanitare e spitalit. Gjithashtu në emisionin ' Stop' të datës 12.01.2021 janë transmetuar pamjet për ngjarjen e ndodhur. Në datën 28.11.2020, mamaja e kallëzueses është shtruar te Spitali Universitar "Shefqet Ndroqi", pasi ka rezultuar pozitive me COVID- 19 dhe ka ndërruar jetë po në këtë spital më datë 25.12.2020. Në derë i është paraqitur një shtetase e veshur si infermiere dhe i ka thënë që është infermiere në spitalin "Shefqet Ndroqi". Kjo shtetase ishte Tire Alldervishi dhe që më vonë ka marrë vesh se punonte si sanitare në këtë spital", - thekson Prokuroria e Tiranës. Kjo e fundit bën me dije se që në momentin e parë i ka kërkuar një shumë lekësh prej 2000 lekësh që t'i jepte telefonin mamit, duke i thënë që po e bënte për atë, edhe pse nuk e kishte parë asnjëherë më përpara. Më pas i thotë që ta presë në lokal. Kur vjen në lokal i ka thënë se, meqenëse infermierët e tjerë nuk lejohen të vijnë në lokal, e ka marrë ajo përsipër, duke i kërkuar shumën e lekëve, e cila ishte 10000 për doktoreshën dhe 5000 për infermierët dhe sanitarët që i hiqnin pampersin. Kjo shumë vazhdonte çdo ditë dhe kanë qenë ditë të pakta që kallëzuesja ka dhënë vetëm 3000 lekë për infermierët dhe 5000 për doktoreshën, dhe përpos tyre i jepte listën e ilaçeve që duhej të merrte nga jashtë. Kallëzuesja nuk e dinte a po ia jepnin ilaçet apo jo, sepse mami i saj i kishte thënë me mesazhe që nuk i japin asgjë nga ato që i sillnim ata", - shton Prokuroria e Tiranës. Shuma e paguar në total është rreth 800.000 lekë të reja, pa llogaritur ilaçet që kallëzuesja sipas instruktimit të Tire Alldervishit i blinte nëpër farmaci të ndryshme për t'ia dhënë asaj, me qëllim që të bëhej mjekimi i mamasë së saj. "Komunikimet ndërmjet Tire Alldervishit dhe kallëzueses janë bërë si verbalisht ashtu edhe nëpërmjet rrjetit të komunikimit What's Up. Është ndaluar shtetasja Tire Alldervishi dhe ndaj saj është depozituar kërkesa e Prokurorisë për vleftësimin e ndalimit dhe caktimin e masës së sigurisë ' arrest në burg'. Prokuroria pranë Gjykatës së Shkallës së Parë Tiranë do të kryejë një hetim të plotë dhe të thelluar për të qartësuar nëse ndodhemi para një rasti sporadik apo para një skeme të mirëfilltë përfitimi nga personeli mjekësor apo ndihmës në kurriz të të sëmurëve me sëmundjen COVID- 19, duke mos hezituar të vërë para përgjegjësisë penale këdo që do të rezultojë i implikuar", - nënvizon Prokuroria.