I mori 8 mln lekë vajzës së pacientes me COVID, Tire Alldervishi kërkon lirinë në Apel: Jam prekur nga pandemia, rrezikoj të infektoj të tjerët
TIRANË – Pas disa ditësh qëndrimi në qeli, sanitarja e spitalit COVID- 2, Tire Alldervishi, ka kërkuar në Gjykatën e Apelit që të lirohet nga masa e “arrest me burg” për shkak se është e infektuar nga pandemia e koronavirusit. Alldervishi pretendon se ka qenë edhe vetë e shtruar në spital për shkak se ishte e infektuar, por ende nuk është negativizuar dhe për këtë arsye përbën rrezik për të infektuar të tjerë në qelitë e paraburgimit. “Unë kam qenë vetë e infektuar me COVID- 19 dhe isha shtruar në spital. Por ende nuk jam negativizuar. Kështu jam rrezik për të infektuar të tjerët në qelitë e paraburgimit,”- shkruan ajo në kërkesën e saj. Duke nxjerrë për herë të parë edhe një alibi, të cilën nuk e ka përmendur në seancën e parë gjyqësore ku edhe iu caktua masa e sigurisë. Një tjetër argument i përdorur nga mbrojtja e Alldërvishit është edhe regjistrimi i saj nga emisioni investigativ, e sipas tyre ato filmime të përdorura për procedimin penal janë të jashtëligjshme.
Për këtë çështje, prokuroria e Tiranës ka hapur një hetim dhe ka sekuestruar regjistrat e hyrje daljeve në COVID- 2, pamjet filmike dhe ka marrë në pyetje disa nga personat që kanë dijeni për rrethanat e hetimit. Pak ditë më parë, Alldërvishi u denoncua nga vajza e një pacienteje që ndërroi jetë në COVID- 2, për të cilën Tirja kishte kërkuar para në ditë të ndryshme në afro 8 milionë lekë, me argumentin se kujdesej për shëndetin e nënës së saj. Ndërsa në përgjimet telefonikë Tirja i drejtohej vajzës duke i thënë “mund të gjesh edhe dikë që të shërben më lirë, s’më mbetet hatri”. Pas zbulimit të mashtrimit, Alldervishi ra në pranga, ndërkohë që tashmë bijon hetimi pasi dyshohet se fshihen të tjerë persona pas sanitares.