Komisioni i Ligjeve voton për shpronësimet në Fier, gati ndërtimi i spitalit

Punimet për ndërtimin e spitalit të Fierit kanë nisur prej ditësh, ndërkohë që dje Komisioni i Ligjeve i dha të drejtën Agjencisë Shtetërore për Shpronësimin të negociojë me pronarët e tokës. Erlis Hereni, kreu i Agjencisë Shtetërore për Shpronësimin, deklaroi: “Spitali i rajonit të jugut të Fierit duhej të niste punimet e menjëhershme. Kjo është arsyeja se përse janë nënshkruar marrëveshje me vullnet të plotë nga të dyja palët, ku secila nga palët ndërmerr angazhimin e vet në zbatim të ligjit dhe Kushtetutës, ku banorët dakordësojnë që të japin tokën e tyre në mënyrë të menjëhershme, duke lejuar kompaninë të fillojë ndërtimin dhe për të përfunduar këtë projekt sa më shpejt. Ndërkohë, Agjencia Shtetërore për Shpronësimin angazhohet që të kryejë brenda 90 ditëve, duke mos hequr në asnjë moment të drejtën e tyre për t’iu drejtuar gjykatës nëse nuk bien dakord me masën e shpronësimit”. Nisja e punimeve me akt normativ, sipas Ministrisë së Infrastrukturës është bërë për shkak të objektit të rëndësisë së veçantë. Etjen Xhafaj tha: “Akti normativ për autorizimin e Agjencisë Shtetërore për Shpronësimin për negocimin e afatit të shpronësimit pronarëve të pasurive të paluajtshme të nevojshme për ndërtimin e spitalit të Fierit është propozuar në bashkëpunim me Agjencinë Shtetërore për Shpronësimin dhe është mbështetur në kërkesë specifike të Ministrisë të Shëndetësisë dhe Mbrojtjes Sociale. Akti normativ ka synim autorizimin e Agjencisë së Shpronësimit për negocimin e afatit të shpronësimit me pronarët e pasurisë së paluajtshme në territorin ku do të ndërtohet spitali i Fierit, që është edhe spitali për rajonin jugor”. Më pas, akti normativ do të kalojë në seancë parlamentare për të marrë fuqi të plotë.