Futbollistët e ‘Euro 2016’ pa pasaportë diplomatike, Lila: Kryeministri Basha do t’i rikthejë në shtator
Hakmarrje politike e quajti Andi Lila kërkesën e Ministrisë së Jashtme për futbollistët e ‘Euro 2016’ që të dorëzojnë pasaportat diplomatike. Ish-futbollisti i Kombëtares u shpreh se ky vendim erdhi pasi iu dhurua bluza e Kombëtares kryedemokratit Lulzim Basha. Për këtë të fundit, Lila ka siguri të plotë se do të rikthejë pasaportat diplomatike për futbollistët në shtator, kur të krijojë qeverinë e tij. “Në 2016 nga kryeministri u pritëm me ceremoni shtetërore për rezultatin historik sportiv, pasi dërguam Shqipërinë në Europian. Ndërsa sot, vetëm për faktin se futbollistët e Kombëtares i dhurojnë bluzën e Kombëtares z.Lulzim Basha, ju kërkohet nga zyrtarët e kësaj mazhorance që të dorëzojnë pasaportat diplomatike. Kjo sjellje inatçore nuk mund të jetë standardi i sjelljes së një shteti demokratik që aspiron për t’u bërë anëtar i BE-së. Sigurisht që ata që tallen me sportistët, që i duan ata vetëm për t’i përdorur sportistët si fasadë për propagandën e tyre të dështuar do të marrin ndëshkimin me votë nga sportistët. Këto pasaporta, që si një hakmarrje e ulët po iu hiqen sot futbollistëve, do t’ju rikthehen menjëherë në shtator 2021 si një nga vendimet e para që do të marrë qeveria e Kryeministrit Basha. Sot çdo sportist e ka kuptuar se, edhe në sport ka ardhur koha për ndryshim, ndryshim që do të vijë më datë 25 prill”, - tha Lilaj, kordinator për sportin në PD. Nga ana e saj, ministrja Olta Xhaçka shpjegoi se pasaportat diplomatike skadojnë njësoj si mjetet e tjera të identifikimit. “Shumë zhurmë për asgjë! Vlefshmëria e pasaportave diplomatike mbaron siç mbaron vlefshmëria e çdo dokumenti identifikimi që përdoret në shtetin shqiptar, qofshin këto pasaporta apo karta identiteti”,- tha Xhaçka.