“Kandidatët e PS punojnë për vete”, Kryemadhi: Do të ndëshkojmë me votë mashtruesit
Kryetarja e LSI-së, Monika Kryemadhi, gjatë një takimi me banorët në Peqin, akuzoi dje kryeministrin Edi Rama se kërkon votën e qytetarëve në këmbim të vaksinës kundër COVID-19. “Në çdo moment ndjej shkërmoqjen e Rilindjes dhe shumë socialistëve në radhët e LSI-së. Një kryeministër i cili ka një urrejtje patologjike për njerëzit e tij, sepse mjafton të dëgjosh ‘kush nuk më voton mua, kush nuk më përkrah mua nuk bën vaksinën’”, - tha Kryemadhi. Sipas saj, në 8 vite qeverisje të socialistëve, në Shqipëri janë taksuar të varfrit dhe jo të pasurit. “Rama dhe Rilindja kanë taksuar të varfrit, ata që s’kanë mundësi, dhe nëse ti nuk paguan taksat, përfundon në burg”, - u shpreh kryetarja e LSI-së. Kryemadhi shpjegoi edhe ndryshimin mes kandidatëve për deputetë të LSI-së dhe atyre të PS-së. “Kandidatët e LSI-së, ndryshe nga kandidatët e Rilindjes, nuk kanë në fokus kush merr vota për të thyer listën, kanë në fokus si të shtojmë vota te kutia për LSInë”, - tha ajo. Kryemadhi iu bëri thirrje qytetarëve që të ndëshkojnë me votë qeverinë “Rama”, duke thënë se ka detyruar të rinjtë të largohen nga Shqipëria. 25 prilli për kryetaren e LSI-së duhet të jetë një referendum popullor për të ndëshkuar me votë keqqeverisjen e Edi Ramës. “Sepse njerëzit nëpërmjet votës ndëshkojnë atë që i ka gënjyer dhe që nuk ka mbajtur premtimet, dhe përsëri nëpërmjet votës vlerësojnë politikanin, individin apo partinë politike që ata i përfaqëson më mirë”, - tha ajo. Teksa vendi sipas saj po përballet me papunësi, kryeministri shkon në kufijtë e absurdit, duke sjellë si krahë pune punëtorë nga vendet e botës së tretë. “Ky njeri nuk i konsideron më qytetarët e tij, i zëvendëson, dhe pa pikë turpi thotë që ne do të marrim punëtorë nga Bangladeshi, nga Pakistani etj.”, - u shpreh Kryemadhi.