Flutura Açka emocionohet nga fjalët e shkrimtarëve e studiuesve: Kur shkruaj për Elbasanin jam e vërtetë

Shkrimtarë, poetë, studiues, njerëz të njohur të letrave nga Elbasani dhe Shqipëria u mblodhën dje në Teatrin e Kalasë në një pasdite kushtuar mbështetjes për autoren Flutura Açka dhe ekipin e PD në këtë qark, në fushatën për zgjedhjet e 25 prillit. Ish-ministri Besnik Mustafaj u shpreh se ai beson që Flutura sakrifikon për Elbasanin dhe për Partinë Demokratike duke pranuar këtë ofertë politike. Ndërsa Rexhep Shahu tha se beson që Flutura Açka do të jetë një avokate e shkrimtareve. “Njerëz me përvojë të jashtëzakonshme i duhen shoqërisë, i duhen atij parlamenti që nuk e di se çfarë bën”,-tha mes të tjerash studiuesi Behar Gjoka. Flutura Açka u shpreh e emocionuar nga fjalët dhe mbështetja. Ajo tha se kur shkruan për Elbasanin është gjithnjë e vërtetë. “Kur mbarova romanin ‘Ku je’, është një roman i gjatë, ndër romanet e mia më të vështirë, e pranoj, sepse ka të bëjë me vitet ‘80, me vite shumë të vështira, jo vetëm të miat. Unë isha në fillimet e shkollës së mesme, gjatë shkollës së mesme në ato vite… dhe kur e mbarova ia dhashë korrektores time. Kur e mbaroi më telefonoi në mes të natës dhe më tha: Flutura, ai Artur Hobja, cili është ai njeri?… Ishte fjala për personazhin. I thashë: Dorina, ai njeri nuk ekziston, ai është krijesë e imja, është karakter, është personazh. Me tha: Unë kujtova se është i vërtetë, se kishte jetuar ai. I thashë: Dorina, ti pa dashje më ke bërë një kompliment kaq të madh, të marrësh një kompliment kur mbyll ti librin, kjo ishte ngjarja më e bukur që mund të më ndodhte, që të thuash për një personazh se ka qenë i vërtetë, do të thotë që kur shkruaj për Elbasanin jam tërësisht, pafundësisht e vërtetë”, – tha Açka.