Kontejneri me kokainë në Durrës, policia u informua 2 javë më parë për nisjen e ngarkesës nga Ekuadori
Një nga importuesit i arrestuar më parë në Itali për trafik heroine e kokaine Policia: Droga erdhi për llogari të 3 grupeve kriminale
jë ditë pas sekuestrim it të sasisë prej 143 kg
në portin e Durrësit, janë zbardhur detaje të reja në lidhje me operacionin antidrogë. Mësohet se policia kishte marrë informacion rreth 2 javë më parë për nisjen e ngarkesës nga Guayaquil, ndaj dhe kishte shtuar kontrollin në port për të gjitha ngarkesat nga Amerika Latine. Sipas burimeve policore, kontejneri nga Ekuadori kaloi transit në Itali në portin Gioia Tauro, por nuk u kontrollua. Në dokumentacionin shoqërues kontejneri i ngarkuar me banane kishte destinacion Tiranën.
Me të mbërritur në portin e Durrësit, ai iu nënshtrua kontrollit me skaner, i cili dha sinjal të kuq. Për ta kaluar në vijën e dytë të kontrollit, policia thirri një prej administratorëve të kompanisë “Masabi Fruits” Klajdi Xibrakun. Në prani të tij u sharrua pjesa metalike e tavanit ku u konstatuan pakot me lëndë narkotike.
Klajdi Xibraku u arrestua nga ana e policisë dhe pak orë më vonë u arrestua edhe administrator tjetër Erjon Peti. Të dy të arrestuarit të cilët janë edhe kushërinj me njëritjetrin mohojnë të kenë lidhje me trafikun e drogës. Ata thonë se operojnë në fushën e importit të frutave prej 5 vitesh dhe çdo javë presin kontejnerë nga Amerika Latine, por nuk janë përfshirë kurrë në trafik droge.
Ndërkaq, burime për Report TV kanë bërë me dije se një nga pronarët e shoqërisë “Masabi Fruits” që importoi ngarkesën e bananeve brenda të cilave u zbulua droga, në të kaluarën është arrestuar në Itali pikërisht për trafik kokaine. Sipas informacioneve, Erion Peti, lindur në Tiranë me 11 korrik 1979, është arrestuar me 4 mars 2004 nga karabinierët e Peschiera del Garda në provincën e Veronës për trafik heroine dhe kokaine. Hetuesit italianë e konsideronin si një pjesë të rëndësishme të organizatës dhe pas tij u arrestuan dhe 8 anëtarë të tjerë të të njëjtës organizatë. Gjatë operacionit u sekuestruan 7 kg kokainë dhe heroinë. Erion Peti është kushëri i Klajdi
Xibrakut, edhe ai ortak me 50 % i “Masabi Fruits” që importonte banane dhe i tregtonte me markën Bo Bananas. Tani policia dhe prokuroria po përpiqen të kuptojnë rolin e tyre në blerjen e 143 kileve të kokainës dhe mbi të gjithë se kush janë gjithë financuesit e kësaj sasie të madhe droge. Policia dyshon se ngarkesa prej 143 kg drogë ka ardhur në Shqipëri për llogari të 3 grupeve të ndryshme kriminale. Ndërkaq, policia ka sekuestruar telefonat celular të dy të arrestuarve si edhe gjithë dokumentacionin e kompanisë. Hetimet vazhdojnë ndërsa dy të arrestuarit pritet të dalin para gjykatës pas 72 orësh.