Mediu me banorët e Rrogozhinës: Shqiptarët meritojnë një kryeministër dinjitoz

Kreu i PR-së, Fatmir Mediu, gjatë një takimi elektoral me banorët e Rrogozhinës u bëri thirrje qytetarëve që të mos e nënvlerësojnë 25 prillin, por të shkojnë e të votojnë për të ruajtur dinjitetin dhe vlerat kombëtare. Përmes votës, sipas tij, qytetarit nuk do t’i japin fund vetëm korrupsionit, por gjithashtu do të ndalojnë Ramën që të shkatërrojë dhe shpopullojë vendin, duke zgjedhur një kryeministër dinjitoz dhe vizionar. “Aferat korruptive të kryeministrit Rama, interesat personale dhe mbështetja e krimit kanë lënë pas dore çdo shqiptar dhe po fundosin çdo ditë e më shumë ekonominë dhe jetën e secilit. Kjo shprehet qartazi me tendencën në rritje të shqiptarëve për të braktisur vendin dhe planin shpopullues të Edi Ramës. Shqiptarët meritojnë shumë më shumë se kaq, një kryeministër dinjitoz, vizionar, që punon për interesat kombëtare dhe jo ato personale, që nxit ekonominë, punësimin, që respekton vlerat morale dhe njerëzore që kanë shqiptarët”. Si përfaqësues i një partie që bazë kryesore ka familjen, ai shtoi se duhet luftuar pikërisht për të mbajtur bashkë dhe të fortë familjen shqiptare, e cila sot po kërcënohet nga kjo qeveri. “Duke i thënë të gjitha këto, unë mendoj që gjithsecili, i majtë apo i djathtë, e ka të lehtë që të bëjë vlerësimin se çfarë nuk shkon në këtë vend. Jetën, lirinë, mundësinë për të ndërtuar mirëqenien tonë familjare, ekonominë tonë kombëtare, na i ka falur Zoti. Ne nuk mund të pranojmë që Edi Rama të bëhet Zot mbi jetët tona dhe të shkatërrojë këto mundësi të jashtëzakonshme që ne i kemi fituar”, - tha Mediu.