Dibër, sherr për tubat e ujit të vaditjes, dy vëllezër vrasin me automatik fqinjin
Autorët kërcënuan edhe dëshmitarin okular. Arrestohet Muhamet Mera, tjetri në kërkim 50-vjeçari Xhetan Konesha u qëllua për vdekje në sy të vajzës adoleshente
Konflikti për një tub uji i ka marrë jetën një 50vjeçari në fshatin Luzni të Dibrës ditën e djeshme. Mësohet se dy vëllezërit Muhamet dhe Altin Mera, përkatësisht 30 dhe 42 vjeç, kanë vrarë me armë zjarri tip automatik komshiun Xhetan Konesha. 50vjeçari u dërgua me urgjencë në spital, ku edhe ndërroi jetë si pasojë e plagëve të marra. Ndërkohë, “News24” dhe “Gazeta Shqiptare” kanë siguruar dëshmi të bashkëfshatarëve të autorëve dhe viktimës. Sipas tyre, dëshmitare e skenës së krimit u bë vajza 18-vjeçare e viktimës, e cila sapo do të ikte bashkë me babain e saj me furgon drejt qytetit. Dëshmitar i ngjarjes u bë edhe një djalë i ri, i cili madje ishte kërcënuar. “Do të të vrasim edhe ty”, mësohet t’i kenë thënë dy vëllezërit bashkëfshatarit të tyre. Po ashtu, banorët bënë me dije se sherri mes viktimës dhe dy vëllezërve ishte i hershëm, ndërsa në verë ata ishin zënë në lokalin e fshatit. “Mollë sherri” mes dy familjeve ishte bërë uji i vaditjes, pasi në muajin gusht dy vëllezërit i kishin prerë tubat e vaditjes Xhetan Koneshës. Po ashtu bëhet e ditur se viktima dhe dy vëllezërit kishin lidhje miqësore mes tyre (Konesha ishte dhëndër në fisin Mera, ndërsa i kishin shtëpitë vetëm 200 metra larg. Gjatë aksionit, blutë e Dibrës vunë në pranga 30vjeçarin Muhamet Mera si dhe sekuestruan armën e zjarrit tip automatik, me të cilën dyshohet se është kryer vrasja. Policia është vënë në kërkim të vëllait tjetër Altin Mera, i cili është larguar në pyll.
NJOFTIMI I POLICISË
Plagosën me armë zjarri një shtetas, me pasojë vdekjen e tij, falë reagimit të menjëhershëm dhe profesional të Policisë, kapet dhe vihet në pranga një nga autorët e dyshuar të ngjarjes. Shpallet në kërkim bashkautori tjetër i dyshuar. Sekuestrohet edhe arma me të cilën dyshohet se autorët kanë plagosur me pasojë vdekjen, 50-vjeçarin.
Strukturat e Drejtorisë Vendore të Policisë Dibër, pas marrjes së informacionit se në fshatin Luzni,
Dibër, gjatë një konflikti për motive të dobëta, dy vëllezër kishin plagosur me armë zjarri fqinjin e tyre, menjëherë kanë organizuar punën dhe falë reagimit të shpejtë dhe profesional kanë bërë të mundur kapjen dhe prangosjen e njërit prej autorëve, shtetasin M.M., 30 vjeç, banues në fshatin Luzni, Dibër.
Ndërkohë vijon ndjekja dhe krehja e zonës për kapjen e bashkautorit tjetër të ngjarjes, shtetasit A.M., 42 vjeç, i cili pas ngjarjes është larguar në pyll. Dy vëllezërit, gjatë një konflikti për motive të dobëta, kanë qëlluar me armë zjarri automatik shtetasin Xh.K., 50 vjeç, i cili si pasojë e plagëve të marra ka ndërruar jetë në spital.
Shërbimet e Policisë kanë gjetur dhe sekuestruar në cilësinë e provës materiale armën e zjarrit automatik me të cilën dyshohet se dy vëllezërit kanë plagosur 50-vjeçarin. Grupi hetimor, nën drejtimin e Prokurorisë së Rrethit Gjyqësor Dibër, po vijon punën për zbardhjen e plotë të rrethanave dhe shkakut të ngjarjes.