Hyn në fuqi vendimi, zbardhen datat e provimeve kombëtare të arsimit bazë
Nxënësit mbetës kanë të drejtë t'i japin provimet sërish në sesionin e dytë Testimi shtesë që do të zhvillohet për nxënësit e pakicave kombëtare
Provimet kombëtare të arsimit bazë për vitin shkollor 2020-2021 do të zhvillohen përgjatë muajit qershor. Vendimi ka hyrë në fuqi ditën e djeshme menjëherë pas botimit në Fletoren Zyrtare. "Në mbështetje të nenit 102 të Kushtetutës së Republikës së Shqipërisë dhe të neneve 26 e 50, të ligjit nr. 69/2012, "Për sistemin arsimor parauniversitar në Republikën e Shqipërisë", të ndryshuar, UDHËZOJ: Provimet kombëtare të arsimit bazë për vitin shkollor 2020-2021 (sesioni i parë) do të zhvillohen si më poshtë: lënda "Gjuhë shqipe", më 16 qershor 2021; lënda "Matematikë", më 21 qershor 2021; lënda "Gjuhë e huaj" e parë, më 25 qershor 2021",-thuhet në vendim. Ndërkohë nxënësit e pakicave kombëtare zhvillojnë edhe provimin kombëtar të arsimit bazë në lëndën "Gjuhë amtare". Provimi kombëtar i arsimit bazë në lëndën "Gjuhë amtare" do të zhvillohet më 11 qershor 2021.
SEKSIONET DYGJUHËSHE
Gjuhët e huaja të para, që do të jepen si provim i detyruar, janë: Anglisht, Frëngjisht, Italisht dhe Gjermanisht. Testi i gjuhës së huaj të parë hartohet në përputhje me gjuhën e cila, në planin mësimor të arsimit të mesëm të ulët, trajtohet si gjuhë e huaj e detyruar në nivelin gjuhësor A2. Nxënësit e klasave të 9-ta të shkollave mbështetëse të seksioneve dygjuhëshe franceze, italiane dhe gjermane japin provim gjuhën përkatëse të seksionit në nivelin gjuhësor A2.
RREGULLORJA
Çdo provim kombëtar i arsimit bazë fillon në orën 10:00 dhe zgjat 2 orë e 30 minuta. "Për hartimin e testit në lëndën "Gjuhë amtare" të pakicës kombëtare greke, ndiqet procedura si vijon: a) testi, përgatitet nga një grup pune me 3 mësues dhe 1 pedagog, të ngritur me urdhër të drejtorit të Drejtorisë Rajonale të Arsimit Parauniversitar (DRAP) Fier; mësuesit dhe pedagogu që hartojnë testin propozohen nga Zyra Vendore e Arsimit Parauniversitar (ZVAP) GjirokastërLibohovë,
ZVAP Finiq-Dropull dhe ZVAP Sarandë- Konispol-Delvinë; grupi i punës që përgatit testin mblidhet në ZVAP Gjirokastër-Libohovë; testi tërhiqet në ZVAP Gjirokastër- Libohovë; përfaqësuesit e ZVAP Finiq-Dropull dhe ZVAP Sarandë-Konispol-Delvinë e tërheqin testin në ZVAP Gjirokastër-Libohovë, një ditë para provimit, ndërsa ata të ZVAP Gjirokastër- Libohovë e tërheqin testit në ditën e provimit",-bëhet me dije në vendim. Për hartimin e testit në lëndën "Gjuhë amtare" të pakicës kombëtare maqedonase, testi, përgatitet nga një grup pune me 3 mësues dhe 1 pedagog, të ngritur me urdhër të drejtorit të DRAPsë Korçë. Grupi i punës që përgatit testin mblidhet në DRAP Korçë e testi tërhiqet në DRAP Korçë. Përfaqësuesit e ZVAP Korçë-Pustec e tërheqin testin në ditën e provimit. Nxënësit me aftësi të kufizuara që ndjekin shkollat e zakonshme, i zhvillojnë provimet kombëtare, bazuar në planin edukativ individual me të cilin punojnë në përshtatje me veçoritë e tyre. Drejtoria e institutit të nxënësve që nuk shikojnë "Ramazan Kabashi", e tërheq testin në Qendrën e Shërbimeve Arsimore (QSHA), një ditë para zhvillimit të provimit dhe e kthen atë në sistemin e shkrimit brail. Nxënësit mbetës në provimet kombëtare të arsimit bazë kanë të drejtë t'i japin ato në sesionin e dytë sipas procedurave të parashikuara në rregulloren për zhvillimin e provimeve kombëtare të arsimit bazë në Republikën e Shqipërisë.