Ftesa e Ramës për Bashën, Meta: Nëse duan koalicion PD-PS, ta shpallin që tani

Presidenti Ilir Meta komentoi dje ftesën e kryeministrit Edi Rama për bashkëpunim për kryetarin e PD-së, Lulzim Basha. Ai ironizoi veprimin e kryetarit të qeverisë dhe tha se ftesa e tij është e sinqertë ‘siç ishte ftesa e 17 majit’, ndërsa shtoi se nëse PD-ja do të bëjë bashkëpunim me PS-në dhe anasjelltas, le ta shpallin që tani. “Ftesa e Ramës është shumë e sinqertë si gjithmonë, siç ishte ftesa e 17 majit dhe të gjitha ftesat. Përgjigjja ime në parim është kjo: Ka moral, ka legjitimitet çdo koalicion përpara se qytetarët të votojnë. Do të bëjë PS-ja me PD-në? Le ta shpallin që tani, në mënyrë që të marrin një votëbesim plebishitar. Do ta bëjë LSI-ja me PS-në? Le ta shpallin që tani. Duan ta bëjnë të tria, ta shpallin që tani. Duan ta bëjnë që të 12-ta, ta shpallin që tani. Të jenë të sigurt që do t’i mundë Bojkeni edhe i vetëm”, - theksoi z.Meta. Kryeministri Edi Rama, nga Lezha, iu përgjigj presidentit Ilir Meta, i cili në konferencën për mediat deklaroi se nëse PD, LSI apo çdo parti tjetër duan të bëjnë koalicion me Ramën, ta bëjnë atë para zgjedhjeve të 25 prillit. Rama tha se ata janë dhe do të jenë në opozitë edhe pas zgjedhjeve të 25 prillit, por theksoi se një bashkëpunim PD dhe PS mund të bëhej vetëm nëse Basha distancohej nga ish-kryeministri Sali Berisha dhe presidenti Ilir Meta. “Kishte dalë në konferencë shtypi dhe thoshte ‘Luli po të dojë, le ta bëjë tani atë marrëveshje’. Se çfarë marrëveshjeje duhet të bëj unë! Unë dje i thashë një gazetari ‘jam i gatshëm të bashkëpunoj me opozitën, sepse ata janë dhe do jenë në opozitë, se PS-ja do t’i fitojë zgjedhjet’. Por ama, nëse është e mundur të shkojmë përtej kësaj politike ndasish dhe sherresh dhe të bashkëpunojmë ngushtësisht, por ama, thashë, Luli duhet të ndahet nga Saliu dhe Iliri. Pra kukulla duhet të ndahet nga çelësi që e kurdis. Janë dy çelësa dhe Luli vrapon me vrap të thotë ‘jo’ se nuk mundet. Si të thotë po! Po tha ‘po’, i hoqën baterinë dhe nuk këndon me. Po tha ‘po’ mbaroi. Se vetëm një kukull me bateri mund të jetë një herë Spiderman dhe një herë Borbardhë”, - tha Edi Rama.