Ministrja merr vendimin: Rikthim në bankat e shkollës dy javë para fillimit të vitit mësimor
Kushi: Sfida jonë, zhvillimi i vazhdueshëm profesional i mësuesve dhe përshtatja me ndryshimet e kohës "Mësim plotësues për të gjitha mangësitë në njohuri gjatë pandemisë"
Nxënësit e arsimit parauniversitar do të kthehen në bankat e shkollës dy javë para fillimit të vitit të ri mësimor 2021-2022. Vendimi është bërë me dije nga ministrja e Arsimit, Sportit e Rinisë, Evis Kushi gjatë konferencës të MASR në bashkëpunim me Agjencinë për Sigurimin e Cilësisë në Arsimin Parauniversitar (ASCAP) dhe "UNICEF Albania". "Jemi të vetëdijshëm që ka pasur edhe mangësi në njohuri apo kompetenca të nxënësve. Për këtë arsye, në muajt e fundit kemi punuar intensivisht edhe me ekspertët e MASR dhe ASCAP për të hartuar një strategji se si t'i plotësojmë këto mangësi. Ne kemi vendosur që për vitin e ardhshëm 20212022, dy javë përpara datës zyrtare të fillimit të vitit shkollor, ne do të kemi mësimin plotësues në të gjitha shkollat tona. Ky do të jetë një plan fleksibël në varësi të nevojave specifike që ka çdo shkollë apo zyrë arsimore",është shprehur ministrja gjatë fjalës së saj. Kushi u shpreh se është bërë një punë kolosale edhe për të afruar sistemin arsimor me vendet më të zhvilluara, ku kurrikula e zbatuar është pikërisht ajo e bazuar në kompetenca. "Për zbatimin e kësaj kurrikule, peshën më të madhe e kanë mësuesit tanë, prandaj zhvillimi profesional i tyre është shumë i rëndësishëm", tha ajo.
NDRYSHIMET NË SISTEMIN ARSIMOR
Më tej, ministrja Kushi u shpreh se arsimi është një nga sektorët që po pëson ndryshimet më të mëdha, siç janë ndryshimet në teknologjinë e mësimdhënies, tregun e punës, marrëdhëniet sociale. "Sfida e përbashkët është që t'u përgjigjemi ndryshimeve që ndodhin në kohën e duhur dhe mekanizmat më eficiente, dhe gjithmonë duke mos bërë kompromis për cilësinë"- nënvizoi ministrja. Më tej ajo shtoi se këto ndryshime kërkojnë njerëz që mësojnë gjatë gjithë jetës, që përdorin mirë teknologjinë dhe që zhvillojnë mendimin kritik. "Për të pasur nxënës të mirë, neve na duhen mësues të aftë. E gjithë sfida dhe puna jonë duhet të fillojë nga zhvillimi, përgatitja dhe përshtatja e mësuesit me ndryshimet e reja", tha ministrja. Kjo konferencë u zhvillua për të analizuar arritjet, prioritetet dhe sfidat në politikat arsimore në lidhje me zotërimin e kompetencave të të nxënit dhe me zhvillimin profesional të mësuesve. Gjatë kësaj konference u prezantuan gjetjet dhe rekomandimet për të diskutuar më tej rreth ndërhyrjeve të mundshme në sistemin arsimor. Në fjalën e saj, Ministra Evis Kushi falënderoi mësuesit dhe ekspertët e arsimit për punën, këmbënguljen dhe solidaritetin e treguar gjatë këtij viti shumë të vështirë për arsimin. Kushi falënderoi gjithashtu ASCAP dhe partnerët zhvillimorë, si UNICEF Albania, UNESCO, OECD, dhe KLSH për vlerësimet, sugjerimet dhe rekomandimet që kanë bërë në mbështetje për përmirësimin e punës në arsim.