Këshilli i ri kombëtar, dega e PD-së në Britani: Përshëndesim zgjedhjen, diaspora nuk pajtohet me regjimin autokratik të instaluar në atdhe

Dega e PD-së në Britani gjatë këtyre dy ditëve ka ndjekur me shumë interes dhe shpresë për shqiptarët, procesin e zgjedhjeve të reja për Këshillin Kombëtar të Partisë Demokratike të Shqipërisë. Kryetari i kësaj dege, Naim Hasanit, përshëndeti zgjedhjen e këshillit të ri kombëtar. Nëpërmjet një statusi në rrjete sociale, Hasani shkruan se PD-ja është e vetmja forcë që e dërgon Shqipërinë në arenën ndërkombëtare. Ai shprehet se diaspora nuk e lejon regjimin autokratik të instaluar në Shqipëri. “Përshëndesim përmbylljen e këtij procesi në kohë të shpejtë dhe vlerësojmë vendosmërinë e liderit të opozitës, z.Basha, për t’u dhënë mundësinë demokratëve të zgjedhin dhe të zgjidhen në forumin më të lartë vendimmarrës të PD-së. Me këtë rast ju urojmë fitoren të gjithë të zgjedhurve dhe shprehim besimin se do të punojmë të gjithë së bashku për t’i shkurtuar sa më shumë ditët sistemit totalisht të dështuar, të instaluar në Shqipëri nga “Rilindja” shkatërrimtare. Një betejë e fuqishme na pret në muajt në vijim si në parlament, edhe në arenën kombëtare e ndërkombëtare për në Shqipëri si e gjithë Europa për të faktuar krimin elektoral dhe për të bindur të gjithë shqiptarët për alternativen tonë europiane, demokratike dhe qytetare. Në kushtet ku ndodhet Shqipëria, përfshirja e diasporës në aksionet për të rikthyer demokracinë në Shqipëri është prioritet absolut i Partisë Demokratike dhe jemi të bindur se gjysma e popullsisë së Republikës së Shqipërisë që jeton në mërgim nuk mund dhe nuk do të pajtohet me regjimin autokratik të instaluar në atdheun tonë. Suksese Partisë Demokratike dhe shqiptarëve të ndershëm kudo që ndodhen! Zoti e bekoftë rrugëtimin tonë të përbashkët për të ardhmen e fëmijëve tanë dhe gjeneratave që do të vijnë në tokën tonë arbërore!”, - thuhet në reagimin e degës së PD-së së Britanisë së Madhe.