“Ekonomia”, Tabaku kërkon seancë dëgjimore me Autoritetin e Konkurrencës për rritjen e çmimit të bukës
Në mbledhjen e Komisionit Parlamentar për Ekonominë dhe Financat, deputetët e opozitës ishin të pranishëm fizikisht në një nga sallat e Kuvendit, ku edhe morën fjalën. Kryetari i komisionit, Eduard Shalsi, u dha fjalën deputetëve të PD, Edmond Spaho dhe Jorida Tabaku, të cilët thanë se është absurde që ndërsa shkollat dhe universitetet do të hapen, komisionet parlamentare mblidhen online. Ndërsa deputetja Tabaku kërkoi edhe që të thirret në seancë dëgjimore Autoriteti i Konkurrencës për të kërkuar shpjegime dhe për të hetuar në treg për rritjen e çmimit të miellit, bukës dhe të çmimeve në përgjithësi. “Se pari s’më duket normale që ju i pari që flisni të rrini pa maskë bashkë me stafin e Kuvendit, duhet të nisë nga ne i pari shembulli. Sot e kuptova që sistemi i Kuvendit s’lejon kamerat, monitorohet nga ju, anëtarët e opozitës këtu s’kanë asnjë pjesëmarrje fizike, keni vendosur të na shuani e mos dukemi në ekrane s’është fare normale. Kemi çështje shumë sensitive për të diskutuar, për të thërritur Autoritetin e Konkurrencës në seancë dëgjimore, rritja e çmimit të miellit dhe bukës brenda një dite, hetim në treg pa dalë me raport nga autoriteti dhe situata e krijuar me rritjen e çmimeve na detyron ne të jemi të përgjegjshëm ta thërrasim autoritetin të na bëjë prezantim të situatës çfarë ka ndodhur me rritjen e çmimit të miellit, të çmimeve brenda ditës. Komisioni duhet të thërrasë autoritetin të merren masa të hetojmë çfarë ka ndodhur në treg sa nuk është vonë e të jepen sugjerime”tha Tabaku.