Nishani akuza Ramës: Po fsheh skandalin më të madh të mandatit qeveritar
Ish-presidenti Bujar Nishani komentoi dje deklaratat e kryeministrit Edi Rama lidhur me krizën energjetike. Në një postim në rrjetet sociale, Nishani hedh akuza të forta ndaj kryeministrit, për të cilin thotë se po përgatitet për të fshehur skandalin më të madh të mandatit të ri qeveritar që sapo ka nisur. Sipas Nishanit, nëpërmjet paralajmërimit të rritjes së çmimit të energjisë, Rama po përgatit grabitjen masive të financave të familjeve të çdo shqiptari. “Raporti zyrtar i KLSH tregon se gjatë 8 (tetë) viteve të qeverisjes së Edi Ramës buxheti i shtetit është vjedhur me më shumë se 2(dy) miliardë dollarë, që po të ishin futur në buxhet dhe jo në xhepat e hajnisë, do të kishin mjaftuar për 3 (tre) fishimin e rrogave dhe pensioneve.
Pikërisht këto deklarata të sotme të Edi Ramës tregojnë me gojën e Edi Ramës dështimin skandaloz të Edi
Ramës, penalizimin e rëndë të xhepit të çdo shqiptari prej Edi Ramës. Në këtë situatë ka vetëm një zgjidhje. Largimi i menjëhershëm i Edi Ramës dhe kësaj qeverie. Natyrisht që Edi Rama nuk largohet me vullnet të tij. Sepse ai nuk ekziston tek ai. Largimin e tij duhet ta bëjë menjëherë opozita. Në çdo vend të lirë e demokratik, në një situatë të tillë skandali dramatik mbi ekonominë e shqiptarëve, opozita ka çdo të drejtë dhe legjitimitet politik, kushtetues e politik ta rrëzojë prodhuesin e këtij skandali me çdo mjet demokratik të mundshëm. Por “opozita” e Lulzim Bashës nuk e kryen dot atë mision. Lulzim Basha e ka harruar premtimin që ju bëri demokratëve dhe shqiptarëve pas 25 prillit se ; “tash e tutje ka vetëm një rrugë, ajo e mobilizimit masiv popullor”, “të mos lemë asnjë minutë paqe, asnjë minutë oksigjen për këtë regjim”, - tha Nishani.