Sejko: Sfida e radhës për bankat qendrore është vala e rritjes së çmimeve

Guvernatori Sejko, mbajti një leksion publik virtual të organizuar nga Shkolla Ekonomike dhe e Shkencave Politike të Londrës “Planifikimi për botën e pas-covid: politkat e bankave qendrore në ekonomitë në rritje”

Guvernatori i Bankës së Shqipërisë, z. Gent Sejko, mbajti një leksion publik virtual të organizuar nga Shkolla Ekonomike dhe e Shkencave Politike të Londrës (LSE) me temë: "Planifikimi për botën e pas-Covid: politikat e bankave qendrore në ekonomitë në rritje" Në leksionin e mbajtur, Guvernatori Sejko u ndal në përvojën e vendeve të rajonit të Europës Juglindore në përballjen me tre krizat më të fundit të kaluara si: kriza financiare globale, 2008-2009; kriza e borxhit sovran evropian, 2010-2012; dhe kriza aktuale e pandemisë COVID-19.

Guvernatori u shpreh se me tejkalimin e krizës së krijuar nga pandemia, vëmendja e institucioneve është përqendruar drejt sfidave të reja që paraqiten në panoramën ekonomike si përballja me goditjen e fundit të çmimeve globale, normalizimi i politikave të ndryshme dhe vlerësimi i ndikimeve të mundshme strukturore në ekonomi.

Duke u ndalur më gjatë në përballjen me krizën e COVID-19, Guvernatori u shpreh se të gjitha institucionet koordinuan përpjekjet e përbashkëta për të ndihmuar agjentët ekonomikë në përballimin e kushteve të vështira dhe për të krijuar mundësitë për një rimëkëmbje sa më të shpejtë.

"Si një ndër institucionet kryesore në vend, Banka e Shqipërisë mori në kohën e duhur masat e nevojshme për të mbështetur ekonominë shqiptare të goditur nga pandemia. Këto masa ndihmuan në zbutjen e efekteve negative në mirëqenien e bizneseve dhe individëve, si dhe krijimin e premisave për një rimëkëmbje më të shpejtë të ekonomisë post-pandemi",tha Sejko.

Guvernatori theksoi se Banka e Shqipërisë, duke monitoruar vazhdimisht situatën, përdori një sërë instrumentesh operacionale dhe hapësirën rregullatore në dispozicion, për të minimizuar pasojat e pandemisë në ekonomi dhe në sistemin financiar shqiptar në veçanti. Masat e marra kanë dhënë rezultatin e tyre, duke garantuar ruajtjen e stabilitetit monetar dhe financiar të vendit, dhe lehtësimin e kostove të krizës për bizneset dhe familjet shqiptare. Më tej, Guvernatori Sejko theksoi se një rol të rëndësishëm në përballimin me sukses të kësaj situate luajtën një sërë reformash të ndërmarra nga autoritetet shqiptare me impakt të drejtpërdrejtë në ruajtjen e stabilitetit financiar, por dhe koordinimi i vazhdueshëm në kohë me institucionet ndërkombëtare.

Më tej, prezantimi i Guvernatorit,

u pasua nga diskutimet e profesorëve të Shkollës Ekonomike dhe Shkencave Politike të Londrës (LSE), z. Ricardo Reis, zj. Piroska Nagy-Mohácsi, dhe z. Vassilis Monastiriotis, të cilët e morën fjalën duke vlerësuar mjaft pozitivisht menaxhimin e kësaj krize nga vendi ynë. Ata theksuan se Shqipëria, pavarësisht se një vend i vogël përballë kësaj krize globale, në një situatë me shumë të panjohura dhe me ndryshime të thella ekonomike, politike e shoqërore falë reagimit të shpejtë dhe koordinimit të politikave ekonomike arriti të dalë nga kjo situatë dhe të nisë rimëkëmbjen ekonomike. Në menaxhimin e kësaj krize, profesorët veçuan eficiencën e stimulit fiskal me bashkërendimin e politikës monetare, si dy faktorë kyç që kontribuuan në përgatitjen e një përgjigjeje më të plotë dhe efikase ndaj krizës dhe efekteve të pritshme të saj në nivel kombëtar. Në vijim ata vlerësuan në veçanti masat e marra nga Banka e Shqipërisë brenda fushës së saj të kompetencës të cilat plotësuan mjaft mirë politikën fiskale dhe shtuan se falë këtij koordinimi, përkeqësimi i situatës ekonomike mbeti i përkohshëm dhe tashmë Shqipëria ka marrë rrugën drejt rritjes së qëndrueshme ekonomike. "Monitor"