Gjekmarkaj i përgjigjet Gjinushit me dokumente: Ja si e kërkoi shkrirjen e Akademisë së Studimeve Albanologjike

"Do t'i drejtohem Kushtetueses"

TIRANË - Deputeti i Partisë Demokratike, Agron Gjekmarkaj, i është përgjigjur kreut të Akademisë së Shkencave, Skënder Gjinushit, duke publikuar dokumentet që sipas tij, faktojnë se si Skënder Gjinushi ka kërkuar asgjësimin apo më keq, shkrirjen e Akademisë së Studimeve Albanologjike, duke ia hequr asaj statusin e autonomisë universitare. Gjekmarkaj thotë se do t'i drejtohet Gjykatës Kushtetuese, ndërsa ironizon Gjinushin me fjalët e Fishtës, duke u shprehur se "Rrenat ia ka lanë lija zanat"!". Më herët Gjinushi tha se nuk bëhet fjalë për një shkrirje, por për një bashkim të Qendrës

së Studimeve Albanologjike me Akademinë e Shkencave, me qëllim që qeveria të kthejë më shumë sytë nga shkenca.

DEKLARATA E GJEKMARKAJT

Ja e vërteta e dokumentuar: sesi Gjinushi & Co kanë kërkuar asgjësimin, më keq sesa shkrirjen, e Akademisë së Studimeve Albanologjike

duke ia hequr asaj statusin e autonomisë universitare që kjo gëzon falë Ligjit nr. 80/2015 "për arsimin e lartë dhe kërkimin shkencor në institucionet e arsimit të lartë në Republikën e Shqipërisë", me gjithë të metat e këtij Ligji dhe kthimin në statusin e vendimit të Komitetit Qendror të PPSH-së të vitit 1972 të instituteve të Albanologjisë (Instituti i Arkeologjisë, Instituti i Historisë, Instituti i Gjuhësisë dhe i Letërsisë, Instituti i Antropologjisë Kulturore dhe i Studimeve të Artit etj.)! Shikoni relacionin e Gjinushit dhe reagimin e Akademisë së Studimeve Albanologjike nëpërmjet shkresës zyrtare të firmosur nga rektori legjitim i këtij institucioni, pra i dekretuar nga Presidenti i Republikës, prof dr Luan Perzhita! Sot ai( Gjinushi) i padekretuar dhe jo legjitim, fakt ky për të cilin si deputet i Kuvendit të Shqipërisë do t'i drejtohem Gjykatës Kushtetuese, para gazetarëve foli për "bashkim"! Kishte me thanë Fishta "Rrenat ja ka lanë lija zanat"!