“Zgjedh të ardhmen”, PD mbledh sot Kuvendin Kombëtar
“Përballja me Ramën”, zbardhet rendi i ditës: Do merren masa për të mbrojtur interesin e PD-së “Forca e vetme politike që do të sjellë ndryshimin në Shqipëri”
Partia Demokratike mbledh sot në ambi entet e Pallatit të Kongreseve Kuvendin Kombëtar i thirrur nga kryedemokrati Lulzim Basha. Në rend dite, është situata aktuale në PD-së, aksioni politik që do të ndjekë kjo parti si dhe miratimi i programit organizativ. Demokratët përmbyllën përgatitjet për zhvillimin e Kuvendit teksa në qendër të skenës është montuar një monitor i madh, ndërkohë që në hyrje të hollit janë vendosur tavolinat për komisionerët, ku do të bëhet dhe verifikimi i delegatëve. Ndërkaq në karriget e sallës është respektuar protokolli i masave anti-Covid duke lënë hapësirë mes delegatëve të ulur. Nuk mungojnë banerat me logon e Partisë Demokratike dhe sloganin “Zgjedh të ardhmen”. Mësohet se pika e parë e rendit të ditës ka të bëjë lidhet me situatën politike si edhe marrjen e masave për të mbrojtur interesin e PD-së. Rendi i ditës i Kuvendit Kombëtar është: “1- Vendimmarrje mbi situatën politike si edhe marrjen e masave për të mbrojtur interesin e PD, duke mos lejuar që problemet apo interesat personale të secilit anëtar të dëmtojnë interesat elektorale dhe politike të PD dhe agjendën e saj politike në përballjen me regjimin e Edi Ramës. 2-Miratimi i aksionit politik për të ardhmen e Partisë Demokratike dhe shpalljen e Platformës Qytetare për demokraci, për rikthimin e legjitimitetit dhe demokracisë në vend si edhe ndërtimin e mekanizmit të bashkëpunimit me të gjitha forcat e shoqërisë në përballjen me regjimin e Edi Ramës, i cili në aleancë me krimin e organizuar ka shkatërruar çdo mjet të funksionit demokratike të shtetit shqiptar dhe po nxit braktisjen masive të vendit, kryesisht nga të rinjtë. 3-Miratimi i programit organizativ të Partisë Demokratike për të përgatitur strukturën e partisë për zgjedhjet e ardhshme, sipas objektit “Partia Demokratike, partia e demokratëve dhe e çdo shqiptari të ndershëm-Forca e vetme politike që do të sjellë ndryshimin në Shqipëri”. Lulzim Basha e konsideron 18 dhjetorin si Kuvendin e vetëm të PD-së dhe si mundësinë për bashkim dhe zgjidhje të krizës. Dita e sotme do të jetë një tjetër provë force mes Sali Berishës dhe Lulzim Bashës. Ish-kryeministri do të organizojë referendumin për shkarkimin e Lulzim Bashës, teksa ky i fundit ka thirrur Kuvendin e Partisë ku pritet që të merren disa vendime politike. Lulzim Basha u shkarkua nga kuvendi i 11 dhjetorit me 4446 vota, tani mbetet për t’u parë sa demokratë do të bindë Sali Berisha të votojnë për shkarkimin e tij. Por sado e lartë apo e ulët të jetë pjesëmarrja sot në referendum, kriza në partinë demokratike vetëm sa do të thellohet; pasi Lulzim Basha e mbështetësit e tij nuk e njohin procesin e iniciuar nga Sali Berisha.