“S’ka përjashtime”, Basha: Ejani në Tiranë, më të bashkuar kundër Ramës
Vendimet, Alibeaj propozon largimin e personave ‘non grata’ nga strukturat qendrore. Salianji: Ta kthejmë në rezolutë Kryesia e PD rrëzon disa nga kompetencat e kryetarit. Ngrihet Komisioni i Përhershëm Statutor
Një ditë para mbledhjes së Kuv endit Kombëtar të Partisë Demokratike, kryedemokrati Lulzim Basha ka përcjellë një mesazh për qytetarët shqiptarë. Përmes një videoje të shpërndarë në “Facebook”, Basha vë theksin se sot partia më e madhe opozitare në vend “do të zgjedhë të ardhmen”, ndërsa kujton se mbledhja do të nisë në orën 11:00 te Pallati i Kongreseve. “Nesër (sot) zgjedhim të ardhmen”, - shkruan Basha. Po dje Lulzim Basha u bëri thirrje të gjithë anëtarëve që të jenë të pranishëm. Me fokus bashkimin dhe jo përçarjen, Basha pasi publikoi një video mesazh në rrjetet sociale, ku e cilëson 18 dhjetorin si ditën kur demokratët do të zgjedhin të ardhmen. Nga ana tjetër, ai u dërgoi një mesazh personal në telefon të gjithë anëtarëve ku thekson se pjesëmarrja është e rëndësishme, pasi interesi i demokratëve është mbi atë personal. Për Bashën, Kuvendi është dhe një përgjegjësi kundër atij që ai e quan, regjim i kryeministrit Rama. “I dashur anëtar i Kuvendit Kombëtar, ditën e shtunë, datë 18 dhjetor, ora 11:00, në Pallatin e Kongreseve, Tiranë, mblidhet Kuvendi Kombëtar i Partisë Demokratike, me përgjegjësinë historike për të qenë të bashkuar kundër regjimit të Edi Ramës. Pjesëmarrja e secilit prej nesh, është mesazhi i qartë që interesi i demokratëve dhe PD, sakrifica e tyre, është mbi interesin personal të cilitdo. Ne zgjedhim të ardhmen, për PD, për Shqipërinë”, - thuhet në mesazhin e Bashës për delegatët. Por, ndërsa Basha kërkon pjesëmarrjen e të gjithë anëtarëve, nga ana tjetër lëvizja e Foltores, e drejtuar nga ish-kryeministri Sali Berisha do të zhvillojë në të gjitha degët e PD në rrethe referendumin për shkarkimin e kryedemokratit. Vendim ky i marrë në Kuvendin Kombëtar të mbajtur nga Berisha një javë më parë, ku u ndryshua statuti dhe u votua për largimin e numrit një të demokratëve. 18 dhjetori pritet të jetë vendimtar sa i takon të ardhmes së Partisë Demokratike, pasi demokratët do të vendosin mes Bashës dhe Berishës.
VENDIMI
Një ditë para mbajtjes së Kuvendit Kombëtar, Partia Demokratike mblodhi dje në mbrëmje kryesinë. Pas 3 orësh diskutimesh kryesia vendosi se janë propozuar që subjektet e dekriminalizimit dhe personat e shpallur ‘nongrata’, të mos jenë anëtarë të strukturave drejtuese në PD. Gjithashtu, është propozuar krijimi i Aleancës Qytetare për Demokracinë si organizatë partnere e Partisë Demokratike. Mësohet se nuk do të ketë përjashtime nga Partia Demokratike. Të gjitha këto, pritet të votohen sot në Kuvendin Kombëtar, i cili do të zhvillohet në Pallatin e Kongreseve. Bëhet e ditur se kryesia vendosi ngritjen e Komisionit të Përhershëm Statutor, i cili përbëhet nga 6 anëtarë. Anëtarët janë: Enkelejd Alibeaj, Jorida Tabaku, Ervin Salianji, Kreshnik Çollaku, Taulant Zeneli, Jonila Godole. Gjithashtu, një tjetër vendim ka të bëjë me rënien e disa kompetencave të kryetarit. Pjesë e diskutimeve ishte edhe Kuvendi Kombëtar, që pritet të mbahet nesër. Nga ana tjetër, referendumi i ndërmarrë nga ishkryeministri Sali Berisha, nuk do të njihet nga kryedemokrati Lulzim Basha, pasi ky i fundit e cilëson Kuvendin e 11 dhjetorit si anti-statutor. Burime brenda mbledhjes bëjnë me dije se nënkryetari Enkelejd Alibeaj propozoi që në strukturat qendrore të mos jenë individët ‘non grata’. Lidhur me këtë propozim kanë rënë dakord edhe anëtarët e tjerë të kryesisë ku Ervin Salianji mësohet të ketë kërkuar kthimin e tij në rezolutë. Por Dhurata Çupi mësohet të jetë shprehur: “Kjo është për Sali Berishën. Ta themi qartë dhe shqip. A jemi ne në gjendje ta përballojmë dot këtë ndaj demokrateve?”.