Referendumi, Berisha: Jetike vota e lirë e anëtarësisë së PD-së
Shkarkimi i Bashës, 76 mijë demokratë në referendum, Këlliçi: Nuk duam incidente “Të sigurojmë pjesëmarrjen e të gjithë anëtarëve të PD në votim!”
Sali Berisha kërkon të konfirmojë sot në bazën e Partisë Demokratike shkarkimin e Lulzim Bashës. Kjo do të bëhet përmes një referendumi, në të cilin janë thirrur 76 mijë anëtarë. Anëtarët e Partisë Demokratike mbështetës të Sali Berishës janë thirrur sot në referendum për shkarkimin e Lulzim Bashës si kryetar, ndërsa delegatët që mbështesin këtë të fundit janë thirrur në Kuvend Kombëtar në Tiranë. Pak orë nga mbajtja e referendumit të thirrur për shkarkimin e Lulzim Bashës si kryetar i PD-së, ish-kryeministri Sali Berisha iu drejtua dje me një mesazh komisionerëve. Berisha kërkon që të gjithë të bëjnë përpjekje maksimale me qëllim që të sigurohet pjesëmarrja e të gjitha anëtarëve të PD-së. Ai shprehet se në këtë referendum jetike është vota e lirë. “Drejtuar komisionerëve të referendumit të shpresës, një përshëndetje të përzemërt të gjithë ju komisionereve dhe komisionerëve të qendrave të votimit. Këto orë që na ndajnë nga hapja e qendrave të votimit le të bëjmë përpjekjet me maksimale që të sigurojmë pjesëmarrjen e të gjithë anëtarëve të Partisë Demokratike në votim. Për ne, rëndësi përcaktuese dhe absolute në këtë festival të votës së lirë ka mbi të gjitha, transparenca e procesit dhe administrimi me korrektesë absolute i çdo vote. Në këtë referendum jetike është vota e lirë e anëtarësisë të PD! Suksese”,-shkruan Berisha.
Gjashtë muaj pasi votuan për t’i dhënë një mandat të tretë në krye të partisë, demokratët do të shkojnë sërish drejt kutive te votimit për Lulzim Bashën. Belind Këlliçi anëtar i Komisionit të Rithemelimit të PD-së e quan, “proces historik që bëhet për herë të parë, anëtarësia shprehet me votë, fuqia u delegua tek anëtarësia”. Në të gjithë vendin janë ngritur 106 qendra votimit dhe procesi nis në orën 8 të mëngjesit dhe përfundon në orën 17.00. Por këtë herë procesi i votimit lidhet drejtpërdrejt me situatën e vështirë që kalon Partia Demokratike dhe çarjen e saj. Grupimi i Foltores përcolli mesazhin për ata që mendojnë se mund të ketë përplasje mes demokratëve të Bashës dhe Berishës. “Basha s’e kupton që referendumin s’e ndalon as me vulë dhe as me bravë, kjo është çështje shumice. Ne s’na intereson incidenti dhe konflikti se kemi shumicën”, - tha Këlliçi. Demokratët e thirrur për votim, do të jenë të njëjtët që votuan në 13 qershor për Lulzim Bashën kryetar. “Është e njëjta listë anëtarësie me 13 qershorin, kushdo që vjen me një teser mblidhen dhe njësohet Nr i anëtarësisë 76 mijë”, - deklaroi Belind Këlliçi. Foltorja pas të shtunës do të angazhohet për të përgatitur protestën kundër Vuçiç ditën e hënë.