Përcaktohen vendet, sot referendum kombëtar për shkarkimin e Bashës
Ndërrohen bravat e dyerve të selive, votimi në lokale, pallate kulture dhe ish-zyra elektorale Komision për drejtimin e procesit, Berisha voton pranë ambasadës amerikane
Lideri historik i së djathtës Sali Ber isha dhe Komisioni i Rithemelimit kanë thirrur rreth 76 mijë demokratët për të votuar sot shkarkimin e Lulzim Bashës nga posti i kreut të PD-së. Komisioni i Rithemelimit të Partisë Demokratike i udhëhequr nga Sali Berisha publikoi dje listën e ndërtesave ku do të votojnë përkrahësit e ish-kryeministrit për referendumin e thërritur më 18 dhjetor! Në të gjithë vendin janë ngritur 106 qendra votimit. Procesi nis në orën 8:00 dhe përfundon në orën 17:00. Shumica e qendrave të votimit nuk do të jetë selia e PD-së, por ambiente alternative si lokale lagjesh, pallate kulture apo dhe kinema. Ky organizim i tillë vjen pasi në shumicën e degëve, janë ndërruar bravat e dyerve të selive. Sali Berisha dhe anëtarët e Këshillit Kombëtar nuk do të votojnë si zakonisht në selinë e PDsë, por kanë zgjedhur një lokal pranë ambasadës amerikane për të votuar për shkarkimin e Bashës. Disa kryetarë të degëve janë në mbështetje të Lulzim Bashës dhe nuk e njohin referendumin, e për këtë arsye ditën e sotme selitë e PD-së në rrethe do të jenë të mbyllura. Komisioni i Rithemelimit të Partisë Demokratike ngriti dje Komisionin e Organizimit dhe Kontrollit të Operacioneve Elektorale, që do të merret me drejtimin e procesit të referendumit që do të zhvillohet të shtunën për shkarkimin e Lulzim Bashës. Kryetare e këtij Komisioni do të jetë Albana Vokshi, ndërsa anëtarë do të jenë Genc Pollo, Ervin Minarolli, Enno Bozdo, Edith Harxhi, Keltis Kruja, Oerd Bylykbashi, Gent Strazimiri,
Mimoza Hajdarmataj, Edmond Spaho dhe Ledina Mandija.
QENDRAT
Bazat materiale për referendumin e sotme janë shpërndarë në të gjitha degët e PD-së. Në Gjirokastër janë gjithsej 1100 anëtarë demokratë me të drejtë vote në Bashkinë e Gjirokastrës, Libohovës dhe Dropullit, të cilët do të shprehin verdiktin e tyre në referendum. Janë gjithsej 4 qendra votimi që do të jenë në Pallatin e Sportit, në lokal në qendër të Lazaratit, në një lokal në Libohovë dhe tek ish-zyra elektorale e PD në Urën e Kardhiqit. Qarku Korçë ka 9 qendra votimi, ku 2 prej tyre janë në ishkinematë dhe 1 në qendrën kulturore të fëmijëve. Në Durrës, 2700 anëtarët e kësaj partie janë ftuar në Pallatin e Kulturës të shprehin me votë vullnetin e tyre. Dega Krujë, e cila ka rreth 700 anëtarë pritet të votojë në dy qendra votimi, një në Thumanë dhe një në Krujë, ku do votohet në ambiente të mara me qira. Ndërsa dega e partisë demokratike e Fushë Krujës ka 870 anëtarë, votimi pritet të zhvillohet te qendra shëndetësore e ku është dhe zyra e partisë. Në Berat referendumi do të mbahet te Pallati i Kulturës. Në Shkodër ku dera e Partisë Demokratike vijon të jetë e mbyllur me zinxhirë, referendumi mbahet në 9 qendra, dy në qytet 7 në njësitë administrative. Shoqata e ish-të Përndjekurve u rendit në mbështetje të rithemelimit të Partisë Demokratike nga ishkryeministri Sali Berisha. Në Vlorë janë rreth 1400 anëtarë të PD-së, ku qendra e votimit do të jetë pranë selisë së PD. Ndërkohë nga një qendër votimi do të ketë edhe në Selenice e në Himarë. Po kështu bëhet e ditur se Komisioni i Zhvillimit të Referendumit në PD-Kukës përmbylli përgatitjet për zhvillimin e referendumit për ratifikimin e vendimit nr.6 të Kuvendit të 11 dhjetorit për shkarkimin e kryetarit të PD-së Lulzim Basha. Sot janë thirrur për të votuar 2400 anëtarë të PD-ës në Kukës në ambientet e sallës së Pallatit të Kulturës “Hasan Prishtina”. Materialet kanë mbërritur dhe janë vendosur në pallatin e kulturës ku do bëhet votimi për referendumin.