Beteja mes Bashës dhe Berishës, Rama: Asnjëri nuk ka legjitimitet
Kryeministri: Si analist më intereson përplasja në PD, por të dy po shkatërrojnë partinë “Përplasja mes tyre do ta çojë partinë në degradim”
Kryeministri Edi Rama shpreh bindjen se nga përplasja mes ishkryeministrit Sali Berisha dhe kryedemokratit Basha, do të përfundojë me rrëzimin e të dyve. I ftuar në emisionin “Zonë e lirë”, Rama deklaroi se me këtë situatë, do të fillojë dhe shkatërrimi i kalas-së, Partisë Demokratike.
Sipas tij, asnjë prej të dy palëve nuk ka legjitimitet në “betejën” që po zhvillojnë. “Kjo që ndodh, fillon dhe rrënon kalanë. A do mbajë kalanë apo gërmadhat e saj, këtë nuk e dimë. Kalanë do ta mbajë sherri dhe një proces që do të shkojë në degradim të vazhdueshëm. Këtu nuk ka më rëndësi se kush është kryetar i PD-së. Nuk ka legjitimitet më, nga asnjë prej palëve. Është cenuar legjitimiteti i palëve. E kanë braktisur atë që është bazamenti i lidershipit, qëllimi i përbashkët dhe mbrojtja e interesave të përbashkëta të atyre që udhëheqin. Ndjekin njëri-tjetrin. Hijet që kacafyten në emër të të shkuarës. As njëri e as tjetri nuk kanë lidhje me të ardhmen. E ke parasysh atë që dy njerëz mbahen tek njëritjetri dhe nuk bien. Nuk është se vjen njëri dhe ikën tjetri. Nuk ka më kala aty, do të bien. Edhe njëri dhe tjetri janë qesharakë në përpjekje ekstreme”- deklaroi Edi Rama. Kryeministri mbrëmë hoqi kostumin e kryeministrit dhe diskutoi si analist për situatën brenda Partisë Demokratike. I pyetur se me kë është Rama më Bashën apo me Berishën, kryeministri tha se në mënyrë cinike është me sherrin, ndërsa për të mirën e vendit është me një opozitë që mund të flitet. Kryeministri Rama, shprehet se qeveria nuk ka asnjë punë me debatin brenda partisë, edhe nëse kërkohet ndihma e policisë, nëse degradon situata në selinë blu. “Territoret e partive politike nuk janë prekur nga ndërhyrje të jashtme. Janë pronësi morale e vetë partive politike. Unë si analist them që Rama nuk ka punë fare me atë punë. Kjo është një çështje që ka të bëjë me marrëdhëniet e partisë politike me forcat e rendit. Në këtë punë, Rama nuk ka punë të përzihet. Edi Rama dhe qeveria nuk kanë punë të përzihen në një territor politik. Është një problem i madh, se të dy palët nga ata nuk kanë legjitimitet. Janë pengje të njëri-tjetrit”,deklaroi Edi Rama. Kryeministri bëri të qartë se nuk janë të vërteta akuzat e Berishës, se ai ka ndikuar tek Soros për ta shpallur “non grata” Departamenti Amerikan i Shtetit. Sipas Ramës, qeveria amerikane nuk bën pazare të tilla, duke theksuar se ajo që po ndodh në PD është legenosje e një partie, që ai nuk ka pranuar të bëhet pjesë që ditën e parë. “”Të thuash që Edi Rama me lobistët e tij arriti që t’i kapi dorën sekretarit të shtetit dhe ky të firmosë atë që do Edi Rama, do të thotë kjo që them unë. Kjo është një legenosje e një partie që unë e kam parti kundërshtare dhe nuk kanë pranuar të hyj që në ditën e parë. Sepse i kam thënë çfarë partie opozitare është kjo që këtu këndojnë ata që kanë teserën e Partisë së Punës në xhep, por, megjithatë është një aset i Shqipërisë. Që sot të krijohet një dallgë revanshi ndaj të shpallurit “non grata” nga SHBA është kulmi.
Shqipëria nuk është Kina, Rusia, as Franca e Gjermania. Sikur të ishte një personash kryesor i politikës edhe në Francë edhe në Gjermani kjo gjë nuk do të kalonte pa u vënë re dhe nuk mund të bëhej arsye për të ngritur një dallgë që këtu është goditur sovraniteti. Të thuash që Rama me Sorosin, Erdoganin dhe Vuçiç u bashkuam ne për të shpallur ‘non grata’ Berishën, po pse ca është Saliu?! Unë nuk dua të diskutoj për këtë, por dua ti them shqiptarëve që kush mund të imagjinoje që DASH mund të korruptohet nga miliarderët…nëse qeveria e SHBA do ishte qeveria e një vendi që me para dhe lobingje mund të ndikohej unë po të them që sulltanatet e lindjes dhe vendet e pasura me nafte do t’i kishin pushtuar SHBA, qeveria e SHBA nuk bëjnë biznese të tilla”, tha Rama në emisionin “Zonë e lirë”.