Plotësohet trupa gjykuese, ja 3 gjyqtarët që do të vendosin për Saimir Tahirin dhe Jaeld Çelën
TIRANË - Është plotësuar trupa gjykuese që do të shqyrtojë dosjen e ish-ministrit të Brendshëm, Saimir Tahirit dhe ish-drejtorit të policisë së Vlorës, Jaeld Çela. Mësohet se trupa gjykuese e Gjykatës së Posaçme të Apelit për Korrupsionin dhe Krimin e Organizuar do të kryesohet nga Daniela Shirka dhe dy anëtarët Engert Pëllumbi dhe Igerta Hysi. Dosja e ishministrit, e cila ndodhet tashmë në GJKKO, do të nisë rishqyrtimin më 20 dhjetor të këtij viti. "Komunikohet në mënyrë të përmbledhur se për çështjen në ngarkim të të pandehurve S.T. dhe J.Ç., e regjistruar pranë Gjykatës së Posaçme të Apelit për Korrupsionin dhe Krimin e Organizuar më datë 24.11.2021, me nr. 47 regjistri themeltar, është planifikuar seanca gjyqësore në datë 20.12.2021, ora 09:00.
AKUZA NDAJ TAHIRIT
Pas plotësimit të trupit gjykues, ka rezultuar se çështja do të shqyrtohet nga kryesuese gjyqtarja Daniela Shirka, anëtar gjyqtari Engert Pëllumbi dhe anëtare gjyqtarja Igerta Hysi", thuhet në njoftimin e gjykatës. Ish-ministri Tahiri u vu nën shënjestrën e organeve të drejtësisë në tetor të vitit 2017, pasi autoritetet italiane goditën një grup të strukturuar kriminal në trafikun e marijuanës, që drejtohej nga vëllezërit Habilaj, të afërm të Tahirit. Prokuroria e akuzoi Tahirin për trafik të narkotikëve dhe kërkoi arrestimin e tij, por shumica parlamentare socialiste e bllokoi kërkesën për arrestim dhe e sulmoi hetimin e prokurorisë si të njëanshëm. Në shtator 2019, Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vite burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar. Vendimi i shkallës së parë u prish nga Gjykata e Posaçme e Apelit, e cila e riktheu çështjen për rishqyrtim.