Risitë në vitin 2022, "Londra" vjen në Shqipëri, shqiptarët mund të stampojnë emrin në targa
Njoftimi i DPSHTRR: Shërbimi për "qejflinjtë" e timonit do të jetë me tarifë ekstra Për herë të parë do të kemi targë të personalizuar deri me 7 karaktere, numra ose shkronja
Drejtoria e Përgjiths hme e Transportit Rrugor njoftoi dje disa risi për vendosjen e targave të mjeteve, duke filluar nga viti 2022. DPSHTRR-ja bëri me dije se "për herë të parë do të kemi targë me dimensione më të vogla përpara, për automjetet që kanë kufizim hapësire! Targa e re e vogël do të ketë dimensionet 360 x 100 mm. Shërbimi do të jetë me tarifë ekstra". Nisur nga ky njoftim zyrtar, të gjithë shqiptarët do të kenë mundësinë që të porosisin targat e tyre të personalizuara, me emrat e tyre. Kështu, modeli që shumë shqiptarë kanë ndjekur në Londër, kur kemi parë mjaft raste të personalizimit të targave të automjeteve të tyre, tashmë do të jetë realitet edhe në Shqipëri. Me ndryshimet e miratuara së fundmi, për herë të parë do të kemi targë të personalizuar, deri me 7 karaktere (numra ose germa) e cila për herë të parë do të jetë edhe e transferueshme nga mjeti në mjet (mbartja do të vlejë edhe për targat me përzgjedhje). Ky shërbim do të jetë me tarifa ekstra.
NJOFTIMI I PLOTË I DPSHTRR-SË
Risi për targat shqiptare nga viti 2022!
Miratohen në qeveri ndryshimet në VKM153 (Rregullorja e Kodit Rrugor). Ndër to DPSHTRR-ja sjell risi për të apasionuarit pas mjeteve si më poshtë:
- Për herë të parë do të kemi targë me dimensione më të vogla, për përpara, për automjetet që kanë kufizim hapësire. Targa e re e vogël do të ketë dimensionet 360 x 100 mm (si në foto). Shërbimi do të jetë me tarifë ekstra.
- Për herë të parë do të kemi targë të personalizuar, deri me 7 karaktere (numra ose germa), e cila për herë të parë do të jetë edhe e transferueshme nga mjeti në mjet (mbartja do të vlejë edhe për targat me përzgjedhje)! Ky shërbim do të jetë me tarifa ekstra.
- Për herë të parë do të kemi format targe amerikane, për automjetet që nuk kanë hapësirën e duhur për formatin standard, zakonisht për targën e pasme, me përmasa 305 x 153 mm, kundrejt tarifës ekstra.
- Për herë të parë targat e motoçikletave do të jenë në formatin e ri 177 x 177 mm për t'u përshtatur me hapësirën standard të prodhuesit për motomjetet. Tarifat e njëjta me sot.
- Shpejtohet kompletimi i flotës shqiptare të mjeteve rrugore me targën standard të modelit aktual. Çdo mjet rrugor i pajisur me targa para datës 01.03.2010 (me targa modeli i vjetër), që paraqitet pranë zyrave të DPSHTRR për të marrë një shërbim që lidhet me mjetin, duhet të ndryshojë targat e mjetit rrugor në targa të modelit të ri).
TË GJITHA RISITË VLEJNË PËR TË GJITHA KATEGORITË E MJETEVE RRUGORE CIVILE.
Në vijim, me botimin e ndryshimeve në Fletoren Zyrtare, DPSHTRR -MIE do të procedojnë me aktet rregullatore, caktimin e tarifave, dhe kryerjen e investimeve dhe zhvillimeve informatike përkatëse që do të mundësojnë zbatimin e këtyre risive! Të ardhurat ekstra nga këto shërbime do të shkojnë për modernizimin e DPSHTRR si edhe për projekte e programe speciale mbi kulturën automotive e "Green", sektorin "Retro", "Automotoparkun" e parë shqiptar dhe për aktivitete edukative mbi sigurinë rrugore!