Skandali me të dhënat, publikohen pagat e 637 mijë shqiptarëve
Publikohet një listëpagesë e të gjithë të punësuarve në Shqipëri, prokuroria nis hetimet Nën hetim, dy institucionet që zotërojnë të dhënat personale
Një tjetër skandal ka ndodhur me pub likimin e të dhënave personale të qindra mijërave qytetarëve. Në media qarkullon një dokument, i cili mban emrat e mbi 637 mijë personave të punësuar në sektorin privat dhe atë shtetëror. Të dhënat e pagave të mbi 637 mijë qytetarëve të punësuar në sektorin publik dhe atë privat po qarkullojnë lirisht përmes aplikacionit “Wahatsapp”. Materiali që po qarkullon lirisht nëpër telefonat e qytetarëve të shumtë përmban të dhëna personale si numrin e kartës së identitetit, e gjithashtu numrin e identifikimit të shoqërisë ku janë punësuar, përfshirë edhe pozicionin e punës. Prokuroria bëri të ditur se ka nisur menjëherë hetimet. Në fokus janë Drejtoria e Tatimeve dhe Instituti i Sigurimeve Shoqërore, dy institucionet që i zotërojnë këto të dhëna. Në të dhënat e publikuara tregohet emri dhe mbiemri i qytetarëve, numri i kartës së identitetit, vendi ku ata punojnë dhe paga e tyre e deklaruar pranë Sigurimeve Shoqërore. Ajo që e rëndon situatën është se në listë janë deklaruar një pjesë e mirë e pagave të punonjësve te shërbimit informative shtetëror, zyrtarëve të policisë, apo nëpunësve të institucioneve në të gjitha nivelet. Bashkë më këta janë edhe persona drejtues në kompanitë private, madje edhe të shtetasve të huaj që punojnë në Shqipëri. Publikimi i këtyre të dhënave sensitive bëri që Prokuroria e Tiranës të nisë menjëherë hetimet për Drejtorinë e Tatimeve dhe Sigurimet Shoqërore nga ku dyshohet se mund të ketë rrjedhur informacioni.
Hetimet nuk përjashtojnë as mundësinë që të jetë ndërhyrë nga jashtë në serverat e këtyre dy institucioneve, servera të cilat janë sekuestruar. Tashmë pritet që organi i akuzës të kontaktojë me ekspertë të fushës për të zbardhur këtë skandal. Lista e pagave, një dokument në formatin “excel” tashmë është përhapur në rrjetet sociale dhe aplikacione të tjera, duke kryer një shkelje të rëndë të të dhënave personale të qytetarëve shqiptarë. Qeveria nga ana e saj tha se nuk rezulton të ketë ndodhur ndonjë eksport dixhital i bazës së të dhënave, duke folur megjithatë për një “ndërhyrje kriminale në bazën e të dhënave të pagave”. Mbi qarkullimin e këtyre të dhënave u shpreh edhe Presidenti Ilir Meta. Ai foli për “shkelje flagrante të lirive, të drejtave dhe dinjitetit njerëzor, të ligjeve dhe të Kushtetutës” e duke e cilësuar “një rast paligjshmërie i përsëritur, pas skandalit të patronazhistëve”. Kurse nënkryetari i PD-së, Enkelejd Alibeaj, tha se “pagat dhe të dhënat sensitive të qytetarëve janë tanimë në pazar, në duart e keqbërësve” dhe se përgjegjës për atë që e cilësoi “skandal të përmasave të jashtëzakonshme” është kryeministri Rama. Ky është rasti i dytë i publikimit të të të dhënave personale, pas atij të patronazhistëve. Para zgjedhjeve të 25 prillit, portali “Lapsi.al” zbuloi se të dhënat personale të 900 mijë qytetarëve kishin përfunduar në duart e Partisë Socialiste për qëllime elektorale. Për hetimin e nisur mbi këtë rast nuk ka ende asnjë informacion. Socialistët i dolën në mbrojtje skemës së patronazhistëve, ndërse vetë kryeministri Edi Rama nuk e konsideroi problem publikimin e të dhënave personale. Kjo çështje ishte një nga shqetësimet e ngritura dhe në raportin e vëzhguesve ndërkombëtar për zgjedhjet e 25 prillit.