Kthesë e papritur në hetimet italiane, biznesmeni Rezart Taçi shpëton nga akuzat, nuk vërtetohet bashkëpunimi me mafien
Me rënien e akuzës kryesore për Petruzzellën, bie edhe akuza e vetme mbi shqiptarin
Gazeta italiane “La Repubblica” rapor ton se prokuroria italiane ka rrëzuar akuzat e ngritura ndaj ekonomistit Fabio Petruzzela për bashkëpunim me mafien. Në artikull thuhet se gjykatësi italian, Alfredo Montaldo, i ngarkuar me hetimin e çështjes, është shprehur se ekonomisti Petruzzella do të hetohet vetëm për akuzën e pastrimit të parave, pasi ka qenë pikërisht, ai që ka kërkuar transferimin e rreth 18 milionë eurove. Por, edhe kjo akuzë është kundërshtuar nga ekonomisti, i cili ka deklaruar se paratë kanë qenë të lira në Zvicër para dhe pas transfertës dhe për këtë, sipas tij, i lindte e drejta të vepronte në çdo formë dhe në çdo kohë me ato para. Media italiane raporton se me rënien e akuzës kryesore për Petruzzellën, bie automatikisht edhe akuza e vetme që rëndonte mbi shqiptarin Rezart Taçi, pra ajo e bashkëpunimit me mafien. Për këtë të fundit prokurori Montaldo është shprehur se nuk ka prova që vërtetojnë korruptimin e ndonjë funksionari. Me këtë kthesë të Prokurorisë italiane duket se mbi biznesmenin shqiptar nuk rëndon ndonjë akuzë specifike. Emri i Rezart Taçit u lakua gjatë hetimeve të prokurorisë italiane për ekonomistin Fabio Petruzzella, i cili po qëndron akoma në arrest bashkë me sipërmarrësin 90-vjeçar, Francesco Zummo. Biznesmeni Rezart Taçi është shpallur në
kërkim nga Prokuroria e Posaçme kundër Korrupsionit dhe Krimit të Organizuar. Në pranga kanë përfunduar dy bashkëpunëtorët
e tij, Artur Balla dhe Bledar Lilo. Ish-bosi i kompanisë së naftës “ARMO” akuzohet se është i përfshirë në
pastrimin e parave nga veprimtaritë kriminale, vepër penale kjo e ngritur edhe për dy bashkëpunëtorët e tij.