Kontrolle në subjektet tregtare në prag të fundvitit, sekuestrohen qindra kapsolla dhe fishekzjarrë nga policia e Shkodrës
SHKODËR - Policia e Shkodrës ka kryer kontrolle në subjekte të ndryshme për parandalimin, futjes dhe të tregtimit në mënyrë të paligjshme të lëndëve piroteknike. Pas këtij kontrolli bëhet me dije se janë sekuestruar 850 kapsolla “Zeus” dhe 198 fishekzjarrë, nga të cilët 78 me fuqi të lartë shpërthyese. Uniformat blu bëjnë me dije se është proceduar penalisht pronari i dyqanit, 67vjeçari M.G., që tregtonte fishekzjarrët dhe kapsollat. “Në zbatim të detyrave të përcaktuara në planin e masave të ardhur nga Drejtoria e Përgjithshme e Policisë së Shtetit dhe në telegramin e drejtorit të përgjithshëm të Policisë për intensifikimin e kontrolleve në subjekte tregtare, me qëllim parandalimin e tregtimit në mënyrë të kundërligjshme të lëndëve piroteknike, shërbimet e Komisariatit të Policisë Shkodër kanë ushtruar kontrolle të befasishme në shumë subjekte tregtare. Si rezultat i kontrolleve, në lagjen ‘Perash’, Shkodër, në dyqanin në pronësi të shtetasit M.G., 67 vjeç, shërbimet e policisë gjetën dhe sekuestruan fishekzjarrë dhe kapsolla me fuqi të lartë shpërthyese”, thuhet ndër të tjera në njoftimin e policisë. Mësohet se në përfundim të veprimeve procedurale, shtetasi M.G. u procedua penalisht për veprat penale “Tregtimi i mallrave kontrabandë’ dhe “Fshehja e të ardhurave”. Materialet hetimore i kaluan Prokurorisë së Rrethit Gjyqësor Shkodër, për veprime të mëtejshme. Ndërkaq, Drejtoria Vendore e Policisë Shkodër apelon për të gjithë personat që ushtrojnë aktivitet tregtar që të mos tregtojnë lëndë piroteknike, pasi do të përballen me ligjin dhe fton qytetarët që të denoncojnë në 112 e Komisariatin Dixhital çdo paligjshmëri, duke iu garantuar anonimat të plotë dhe reagim të menjëhershëm e të paanshëm.