Lista, ATP-ja zbardh emrat e pronarëve që do të kompensohen
Paratë do t'i gjeni në bankë në ditët në vazhdim, pas përfundimit të procedurave Si do të shpërndahet fondi mbi 575 milionë lekë
Agjencia e Trajtimit të Pronave njoftoi se ka përfunduar procesin e shqyrtimit për 464 kërkesa, të cilat përfitojnë këstin e parë, të dytë, të tretë, të katërt dhe të pestë të kompensimit në të holla në një total prej 70% të vlerës totale të miratuar me VKM-të përkatëse. "Gazeta Shqiptare" publikon emrat e pronarëve që do të marrin kompensimin. "Procesi i shqyrtimit të këtyre kërkesave dhe i shpërndarjes së fondit të kompensimit është bazuar në ligjin nr.9482, datë 03.04.2006 'Për legalizimin, urbanizimin dhe integrimin e ndërtimeve pa leje', i ndryshuar, në Vendimin
e Këshillit të Ministrave nr.383, datë 19.05.2010 'Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private, që preken nga ndërtimet informale', i ndryshuar dhe në vendimet përkatëse të Këshillit të Ministrave, në të cilët është përcaktuar masa e shpërblimit për secilin pronar. Për 464 (katërqind e gjashtëdhjetë e katër) kërkesat e mësipërme, për të cilat ka përfunduar procesi i shqyrtimit nga ana e ATP-së, ka rezultuar se dokumentacioni i tyre është në përputhje me kriteret e përcaktuara në Vendimin e Këshillit të Ministrave nr. 383, datë 19.05.2010 'Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private, që preken nga ndërtimet informale', i ndryshuar", - bën me dije ATPja. Ndërkohë, 464 kërkesat e miratuara përfitojnë këstin e parë, të dytë, të tretë, të katërt dhe të pestë të kompensimit në të holla në një total prej 70% të vlerës totale të miratuar me VKM-të përkatëse. "Fondi financiar që shpërndahet nga ATP-ja për këto 464 kërkesa është në vlerën 575,355,144.90 (pesëqind e shtatëdhjetë e pesë milionë e treqind e pesëdhjetë e pesë mijë e njëqind e dyzetë e katër pikë nëntëdhjetë) lekë. Agjencia e Trajtimit të Pronave (ATP) njofton subjektet e interesuara se vlerat përkatëse për secilin përfitues do të jenë disponibël në llogaritë e tyre në bankat e nivelit të dytë pas përfundimit të procedurave të transfertave bankare në ditët në vazhdim", thuhet në njoftimin e Agjencisë së Trajtimit të Pronave.