Nisma e re, Rama: T’i lëmë pas llogoret e sherrit politik
Këshillimi popullor, pyetjet për shqiptarët nga integrimi, legalizimi i kanabisit te dënimet “Gjyqtarët që japin vendime të paligjshme duhen pezulluar”
Kryeministri Edi Rama prezantoi dje nismën e re të qeverisë për këshillimin kombëtar për Shqipërinë. Në prag të një viti të ri, qeveria vendosi të hapë procesin gjithëpërfshirës të këshillimit kombëtar për Shqipërinë. Me një pyetësor drejtuar çdo shqiptari në Shqipëri apo në botë, kryeministri Edi Rama njoftoi se do të zhvillohet një kuvendim popullor, ku kërkohet mendimi i qytetarëve mbi çështje me rëndësi strategjike për vendin, ekonominë, shoqërinë. Sipas kryeministrit, me këtë nismë është koha që të lihen pas llogoret e kaluara të politikës dhe për të menduar për gjërat që i bashkojnë shqiptarët. Kreu i qeverisë gjatë fjalës së tij para gazetarëve tha se qytetarët brenda dhe jashtë vendit do të pyeten për mendimin e tyre për disa çështje shumë të rëndësishme me rëndësi strategjike për vendin, ekonominë dhe shoqërinë tonë. Por cilat janë çështjet që renditi kryeministri Rama. “Me besimin se ne shqiptarët kemi mundësi të shkojmë shumë më shpejt përpara nëse e dëgjojmë më shumë njëri-tjetrin, pa u ndarë në llogoret e vjetra politike, që nxisin përçarjen kundër interesit të familjeve shqiptare. Në prag të një viti të ri, mundësish të reja, vjen edhe kjo nismë e re e qeverisë për këshillimin kombëtar për Shqipërinë. Ne me një pyetësor që do t’ua vëmë në dispozicion të gjithë shqiptarëve brenda apo jashtë vendit, do t’i japim jetë një kuvendimi popullor, ku do të thithim mendimin e tyre për çështje me rëndësi strategjike për vendin tonë. Është më shumë se asnjëherë më parë koha për t’i lënë pas llogoret e sherrit politik dhe për të menduar për gjërat që na bashkojnë përtej shumë gjërave që na ndajnë për të hedhur hapa të mëtejshme, duke u këshilluar për vendime që kanë impakte për marrëdhëniet e Shqipërisë me jashtë, në ekonominë e shtëpisë sonë dhe në përpjekjen jetike të kësaj shtëpie për të thelluar arritjet dhe adresuar plagët e padrejtësisë në funksion të luftës në drejtësi”, - tha Rama.
DREJTËSIA
Shqiptarët do të duhet të përgjigjen nëse janë dakord me vendosjen e një ashpërsimi ekstrem të dënimeve për autorët përsëritës të krimeve kundër personit. Këtë e bëri me dije kryeministri Edi Rama teksa prezantoi nismën e këshillimit kombëtar për Shqipërinë, ku do të ketë një kuvendim popullor mbi çështje me rëndësi strategjike për vendin. “Duke pasur parasysh se një pjesë e opinionit kërkon ashpërsim ekstrem në dënimin e autorëve përsëritës të krimeve kundër personit, por në të njëjtën kohë kjo përbën edhe një sfidë në raport me standarde të caktuara apo gjithë procesin tonë, që është i lidhur me botën ku jetojmë ne duam nga qytetarët opinionin e tyre”, tha Rama. Kujtojmë që krimi i rëndë që tronditi Fierin disa javë më parë, ku 8-vjeçari Mateo Vasiu u vra nga fqinji i tij, person me precedentë penalë, ndezi debatin për rikthimin e dënimit me vdekje. Familjarët e të miturit madje kanë dorëzuar edhe një peticion, ku kërkojnë dënimin me vdekje të autorit që vrau 8 vjeçarin. Kryeministri Edi Rama apeloi se të gjithë ata prokurorë dhe gjykatës që nuk e kanë kaluar vetingun, duhet të pezullohen në vend. Kreu i qeverisë u shpreh se ka ende gjyqtarë që marrin vendime të kundërligjshme vetëm pak para se të shkarkohen nga vetingu. Ai solli rastin e një gjyqtareje që ka penguar punën për ndërtimin e qendrës së fëmijëve, duke kërkuar që ajo të thirret nga SPAK. “Ne mendojmë që gjyqtarë dhe prokurorë që nuk e kanë kaluar vetingun, që marrin vendime haptazi kundër ligjit, duhet të pezullohen në vend. Kemi pasur disa raste flagrante në kohë, që nga rastet e rishikimit të dënimeve të monstrave që kanë tronditur Shqipërinë deri tek ata që kanë tjetërsuar pronat. Po ju jap një rast sot për ilustrim. Angazhohet qeveria e Shqipërisë për të ndërtuar Qendrën Kombëtare të Fëmijëve, me një teatër kukullash, përcaktojmë vendin këtu tek ish-Garda, marrim të dhënat e pronës, prona është e jonë, e shtetit. Bëjmë projekt, japim financimin dhe çfarë ndodh? Në momentin që jemi gatim, na del që një gjykatëse ka bërë sigurim padie për një subjekt provat që i ka humbur të gjitha gjyqet me pretendimin se kjo pronë është e tija. Kjo gjykatëse e jep këtë vendim një javë para se të largohet nga vetingu. Këtu janë dy komponentë. E para, kjo gjykatëse duhet të thërritet nga SPAK-u sot, siç duhet të thirren të gjithë ata që nuk e kanë kaluar vetingun. Këta njerëz dufohet të shkojnë para gjyqit, sepse kanë grabitur njerëzit. Ka të tjerë akoma që bëjnë akte të tilla. A duhet që ne ta shtyjmë nismën që këta të pezullohen automatikisht kur marrin vendime të tilla”, - tha Edi Rama.