“Berishistët”, Basha largon 9 drejtues politikë

Disa qarqe, pa drejtues politikë. Emrat që do t’i zëvendësojë kreu i PD-së “Nuk rreshtohem me asnjërin”, s’ka ende vendim për Alizotin

Në një kohë kur Komi sioni i Rithemelimit të PD-së i ka lënë afat Lulzim Bashës deri më 5 janar për të liruar zyrën e kryetarit, kryedemokrati vijon lëvizjet duke larguar nga çdo funksion kundërshtarët e tij brenda partisë. Ndaj, Lulzim Basha po përgatit lëvizjen e radhës. Lulzim Bashës, i cili zëvendësoi mbrëmjen e 23 dhjetorit anëtarët e kryesisë, sekretarët dhe zgjodhi kryetaren e re të Këshillit Kombëtar, do i duhet të zëvendësojë “berishistët” edhe në drejtimin politik në qarqe. Pasi largoi nga kryesia, sekretariatet dhe Këshilli Kombëtar mbështetësit e Berishës, tashmë ai do t’u heqë atyre edhe drejtimin politik të qarqeve. Nga 19 drejtues politikë, 9 prej tyre i janë bashkuar Sali Berishës, mes të cilëve 5 vetëm në qarkun e Tiranës. Basha duhet të zëvendësojë Aldo Bumçin, Agron Shehajn, Albana Vokshin, Belind Këlliçin dhe Flamur Nokën nga drejtimi politik në këtë qark, Edi Palokën në Durrës, Edmond Spahon në Korçë, Bujar Leskajn në Vlorë, e Tritan Shehun në Gjirokastër. Nuk dihet se si do të veprohet në rastin e Tomor Alizotit, i cili deri më tani drejtonte Beratin, por që ka deklaruar se nuk do të rreshtohet as krah Bashës e as krah Berishës. Për shkak se iu bashkuan Berishës, kreu PD-së ka shkarkuar më herët edhe 11 krerë degësh, të cilët përkohësisht janë zëvendësuar nga të tjerë funksionarë të strukturave lokale të demokratëve. Këshilli Kombëtar i PD-së tashmë ka plotësuar vendet e lëna bosh në disa organizma të kësaj force politike, pas krisjes totale të muajve të fundit. Pasi shkarkoi Edi Palokën, kryedemokrati ia besoi drejtimin e Këshillit Kombëtar, një grua, pikërisht Arta Sakja. Po ashtu, është bërë zëvendësimi edhe i drejtuesve të disa sekretariateve. Kështu, sekretar organizativ është vendosur Flamur Hoxha, sekretar ligjor dhe Zgjedhor Indrit Sefa, sekretar për pushtetin vendor dhe decentralizimin Roland Bejko dhe sekretar për emigracionin dhe diasporën Kreshnik Çollaku. Në kryesi sipas listës janë futur, Agron Kapllanaj, Gazmend Koduzi, Xhemal Gjunkshi,

Helidon Bushati dhe Xhelal Mziu. Anëtarë të Komisionit të Apelit, Etikës dhe Disiplinës, kryetare Flutura Açka. Anëtarë janë Dash Sula, Orjola Pampuri, Xhemal Bushati dhe Arbi Agalliu. Kreu i Këshillit Kombëtar, Edi Paloka, u shkarkua pas marrjes pjesë në Kuvendin Kombëtar të iniciuar nga ish-kryeministri Sali Berisha. Po ashtu, Basha shkarkoi edhe anëtarët e kryesisë Flamur Noka, Aldo Bumçi, Gent Strazimiri, Albana Vokshi dhe Oerd Bylybashi. Ndërkohë, u shkarkuan edhe Ervin Minarolli, Ivi Kaso, Belind Kelliçi, Ledina Mandia. Gjatë mbledhjes së Këshillit Kombëtar të PD-së më datë 23 dhjetor, kreu demokrat Lulzim Basha, u ka kërkuar të gjithë anëtarëve që të dalin në terren. Basha ka thënë se duke filluar nga ai i pari do të jetë me demokratët për takime dhe për të folur me ta. “Nga nesër secili duhet të jetë prezent në terren me demokratët, duke filluar nga unë”, mësohet të ketë thënë Basha.

ZËVENDËSIMET Tritan Shehu nuk do të drejtojë më Gjirokastrën, Edi Paloka nuk do të jetë më në krye të Durrësit, Agron Shehaj do të largohet nga drejtimi i degëve 5 dhe 7 në Tiranë. Këta do të zëvendësohen me emra të tjerë, të cilët i kanë qëndruar pranë Bashës, teksa deri më tani në disa degë janë zgjedhur drejtuesit e rinj, ku mes tyre janë 4 nënkryetarët e PD-së, Jorida Tabaku, Grida Duma, Alfred Rushaj dhe Enkelejd Alibeaj, të cilët kanë marrë në “dorëzim” disa degë të Tiranës.