Bënte “namin” duke mashtruar të huajt nga Tirana përmes “Forex”, del fotoja e izraelitit Rafael Genish
Dëshmon punonjësja: Punonim me emra arti, kush mashtronte, paguhej më shumë
Dy ditë pas arrestimit të Rafael Genish, pr onari i një “call center”-i në Tiranë së bashku me 35 të tjerë, mes tyre shqiptarë dhe të huaj me akuzën e mashtrimit kompjuterik të shtetasve të huaj nga Tirana, del fotoja e izraelitit që lëvizte në Tiranë. Mësohet se dje prokuroria kërkoi “arrest me burg” për Genish, i cili ishte prej kohësh nën vëzhgim nga policia. Prej pesë vitesh, izraeliti kishte hapur një “callcenter” në Shqipëri përmes të cilit mashtronte më shumë se 2400 persona. Këta të fundit rezultojnë të jenë nga Gjermania, Franca e Italia. Në momentin që në Shqipëri u përhap lajmi se kishin nisur hetime për “Forex”, Genish kishte planifikuar të largohej nga vendi ynë, por u prangos në kokë. Hetimet zbuluan se kanë kontaktuar më shumë se dy milionë qytetarë europianë, 2 mijë prej të cilëve kanë arritur të mashtrohen dhe u janë marrë nga 500 euro e sipër. Genish dhe 35 punonjësit e tij janë arrestuan, ndërsa 22 të tjerë janë ende nën hetim. Pas operacionit janë sekuestruar “RG Company”, ambientet ku ushtronte veprimtarinë në “call center” në Tiranë, qindra pajisje ndërsa po punohet edhe për të sekuestruar shuma parash, të cilat dyshohet se janë depozituar në llogari bankare brenda dhe jashtë vendit. Në Shqipëri janë shtuar si kërpudhat “call center”, që shërbejnë si ndërmjetësuese mes qytetarëve që duan të investojnë dhe të futen në tregjet financiare dhe bankave, që ndryshe quhen kompani brokerimi. Tregu më i madh financiar në botë që ofron mijëra burime investimesh (çiftet e monedhave, ar, aksione në naftë apo indekse të bursave të ndryshme) është “Forex”, që përfshin edhe tregun e bursave, edhe të mallrave edhe të monedhave dhe dyshohet se pikërisht nën këtë logo luajnë edhe shumë kompani fantazmë të hapura në Shqipëri, që kryesisht mashtrojnë qytetarë të huaj. Në Shqipëri, Prokuroria e Tiranës ka nisur hetimet për të verifikuar në terren këtë treg të paligjshëm, të kompanive që përdorin platforma “online” të brokerimit (ndërmjetësimit) dhe punojnë në të zezë, pra të palincencura. Këto shoqëri që maskohen si ligjore, joshin të huajt nëpërmjet skemave të mashtrimit të investojnë para që kalojnë në llogari të përgjumshme bankare, me premtimin se për një periudhë të shkurtër kohore, investimi i tyre do të shumëfishohet.
Kompanitë “call center” kryesisht marrin me qira ambiente të mëdha në zonat më të populluara në Tiranë, me qindra punonjës shqiptarë, kryesisht të rinj, që paguhen bazë nga 400-700 euro, por që paga e tyre mujore mund të arrijë deri në 3 mijë euro, në varësi të vlerës së investimit që arrijnë të marrin nga personat që bëhen pjesë e sistemit, pasi i kontaktojnë përmes një regjistri telefonik me numra të qytetarëve të një shteti përkatës. Të përzgjedhurit janë kryesisht moshat e thyera, për shkak se mund të mashtrohen më shpejt dhe pa kërkuar shumë detaje që për vetë moshën janë deri duke të pakuptueshme. Vetëm me një kërkim të thjeshtë në internet, me fjalën “Forex Albania” dalin me qindra oferta pune për të rinj me paga mujore të majme dhe që kriter kanë gjuhët e huaja italisht, spanjisht, anglisht, gjermanisht, greqisht dhe frëngjisht. Ndërkohë, në Qendrën Kombëtare të Biznesit rezulton se 11 kompani të ndryshme përdorin “Forex” në Shqipëri. Ndërkaq, “Report TV” ka zbardhur dëshminë ekskluzive të një prej punonjësve të “call center” të “Forex”, e cila ka dëshmuar se periudha e trajnimit të këtyre shtetasve zgjaste vetëm 2-3 ditë dhe eksperienca në punë nuk ishte kriter. Kjo do të shpjegonte edhe faktin se një shtetas, i cili do të fillonte punë në këtë subjekt, mund të fillonte punë edhe në nivelet e larta të këtij subjekti, sipas ndarjes që vetë ata bënin. Nga shpjegimet e po kësaj shtetaseje rezulton se ndryshimi i niveleve brenda subjektit kishte të bënte me ndarjen e punëve për mirëmenaxhimin e mashtrimit, pasi secili nga këta shtetas kryente një punë të caktuar, por nëse do të shohim në nivelin e pagesës, kjo do të reflektonte në pozicionin e tyre, por nga ana tjetër secili nga personat merrte një bonus për kalimin e klientëve nga një sektor në një sektor tjetër. Duke u nisur nga të dhënat e përgjithshme, rezulton se të gjithë kishin dijeni për veprimtarinë që kryenin, pasi të gjithë kishin emra të rremë, të cilët i quanin “emra arti”, të gjithë punonjësit përdornin numra të huaj, pra jo shqiptarë për të komunikuar me shtetasit e huaj. Të gjithë prezantoheshin si shtetas të huaj, me emër të përafërt me emrat e shtetasve në vendin ku kryenin telefonatën si dhe të gjithë këta shtetas kanë pasur në postet e tyre të punës lista me të dhënat e personave, të cilët kontaktonin dhe që ishin potencialisht viktima të telefonatave që merrnin nga këta shtetas.