Skandali i pagave, Rama: Masa të reja antievazion
Ministra e deputetë të arrestuar? Kryeministri: Përgjigjen para ligjit, nëse fshehin pasurinë “Problemi i madh, pagat e padeklaruara të disa kompanive”
Kryeministri Edi Rama i bëri dje thirrje drejtësisë për ndëshkimin e përgjegjësve të skandalit të pagave. Rama komentoi në hapësirën e komenteve me ndjekësit e tij nxjerrjen e të dhënave të qytetarëve shqiptarë, si pagat e targat e makinave. Sipas kreut të qeverisë, përgjegjësit e rrjedhjes së këtyre të dhënave, duhet t’i gjejë drejtësia dhe të ndëshkohen sipas ligjit në fuqi. “Përgjegjësit duhet t’i gjejë drejtësia dhe t’i ndëshkojë sipas ligjit. Uroj që prokuroria të zbardhë sa më shpejt rrjedhën e ngjarjes dhe autorët e krimit”,-shkruan Rama. Ndërkohë për pagat e larta Rama shprehet se ata qytetarë që kanë këto rroga, taksohen sipas ligjit. Problem përmendi Rama mbeten të ardhurat e padeklaruara. “Pagat shumë të larta janë të deklaruara e taksohen sipas ligjit me 23%, por problemi madhor është pjesa e padeklaruar e të ardhurave të shumë kompanive, përfshirë edhe pagat e ulëta fiktive që kompensohen me lekë në dorë. Janë bërë përmirësime të ndjeshme në këto vite, po ka ende shumë luftë për të bërë dhe prandaj do të vijojmë me masa të reja anti-evazion”, - deklaroi kryeministri. Ndërkohë Rama iu përgjigj komentuesit edhe për pyetjen që ka bërë për automjetet që përdorin ministra e deputetë, të dhëna këto të publikuara ë databazën e rrjedhur të targave të qytetarëve. “Ministrat dhe deputetët bëjnë deklarime pasurie të përvitshme, për të cilat mbajnë përgjegjësi penale nëse gjenden në fshehje pasurie. Mua personalisht për shembull me ka ndodhur të ndeshem me lajme të rreme për blerje makinash të shtrenjta apo për shpenzime 700 mijë euro në vit për avion! Marrëzira!”, - theksoi kreu i qeverisë. Edi Rama përmendi se nxjerrja e të dhënave personale është problem edhe në vendet e tjera, por pa dashur ta përdorë këtë fakt si justifikim. “Nxjerrja e të dhënave është një problem me të cilin ballafaqohen të gjitha vendet në epokën e teknologjisë digjitale, qoftë për shkak të sulmeve kibernetike apo qoftë si pasojë e veprimeve kriminale të individëve brenda sistemeve shtetërore! Amerika, Anglia, Franca e me radhë kanë pasur ngjarje të ngjashme dhe madje në ndonjë rast me pasoja tejet të renda përtej kufijve të vetë shtetit, por ky nuk është kurrsesi justifikim, përkundrazi. Prandaj uroj që prokuroria të nxjerrë së shpejti fajtorin dhe drejtësia t’i japë ndëshkimin e merituar, ndërkohë që ne do të finalizojmë sa më parë marrëveshjen që po punojmë prej disa kohesh, për të marrë një njësi të mirënjohur amerikane në mbrojtje të sistemeve tona informatike”, - u shpreh Rama. Sa për përgjegjësinë kryeministri tha se nuk i shmanget kurrë. Por ai përmendi: “Dy gjëra kam në këtë rast: E para, kur ngjarje shumë më të rënda të kësaj natyre kanë ndodhur në shtetet e lartpërmendura apo në të tjera akoma, nuk ka ndodhur që të fajësohen autoritetet shtetërore, por është adresuar problemi për të nxjerrë fajtorët e për të forcuar sistemet. E dyta, mua nuk më servir dot askush asgjë sipas qejfit, sepse detyra ma mundëson që të marr opinione nga shumë drejtime për të njëjtën çështje”.