Sot skadon ultimatumi për Bashën, Komisioni i Rithemelimit: Liro zyrën!
“Jo bunker i pengut, por shtëpi e demokratëve”, Berisha njofton protestë para selisë më 8 janar “Lul Pengu, do të kesh fatin e atyre që bunkerizuan Shqipërinë”
Sot skadon ultimatumi që Sali Berisha dhe mbështetësit e tij i kanë vendosur Lulzim Bashës për t’u larguar nga selia e Partisë Demokratike. Ndërkohë mësohet ora se kur do të mbahet protesta e thirrur nga Komisioni i Përkohshëm i rithemelimit të PD-së dhe Sali Berisha me datën 8 janar në orën 12:00. “Jo bunker i Pengut, por Shtëpi e Demokratëve” shkruhet në posterin e shpërndarë nga ky komision, i cili thërret demokratët t’i bashkohen kësaj proteste. Komisioni i Përkohshëm i Rithemelimit të PD denoncoi se Basha ka nisur ndërrimin e bravave të selisë dhe po vendos dyer të blinduara. Në 23 dhjetor Komisioni i Rithemelimit deklaroi se 43385 vendosën në referendum shkarkimin e Bashës, e për këtë arsye Lulzim Basha deri në 5 janar duhet të largohet nga zyra e kryetarit të Partisë Demokratike. Por, pavarësisht këtij ultimatumi, vetë Basha ka deklaruar se asgjë nuk do të ndodhë në 5 janar, duke injoruar ultimatumin e paraardhësit të tij Sali Berisha. Ndërkaq, në këto ditë të para të vitit, Lulzim Basha ka vendosur të ndryshojë pamjen e selisë së PD, duke veshur me logon e Partisë Demokratike të gjithë fasadën prej xhami të selisë. Ndryshimet në selinë e PD kanë sjellë reagimin e ashpër të Komisionit të Rithemelimit, i cili akuzoi Bashën se po vendos dyer të blinduara në Partinë Demokratike. Në një deklaratë për median, Komisioni deklaron se Lulzim Basha, në prag të protestës paqësore të demokratëve, ka vendosur ta kthejë shtëpinë e tyre në bunkerin e vetmisë dhe pazareve të tij. “Në një akt turpi dhe paniku të denjë vetëm për një aparatçik të marrë peng ai ndërron brava dhe po vendos dyer të blinduara për të shndërruar shtëpinë e demokratëve, selinë e Partisë Demokratike, në bunkerin e tij privat”,- theksohet në deklaratën e Komisionit të Rithemelimit. Protesta
Të shtunën në mesditë ish-kryeministri Sali Berisha ka thirrur në protestë të gjithë demokratët kundër Lulzim Bashës. Slogan i kësaj proteste kombëtare është “jo bunker i pengut, por shtëpi e demokratëve”, duke bërë të qartë se qëllimi i tubimit është largimi i Bashës nga zyra e kryetarit të partisë dhe më pas protesta do të zhvendoset drejt Kryeministrisë. Por në situatën kur Basha ka injoruar Sali Berishën e mbështetësit e tij, dhe po kryen punime në selinë e PD; Komisioni i Rithemelimit deklaroi dje publikisht se bunkerizimi i selisë nuk do të pengojë demokratët ta largojnë Lulzim Bashën. Berisha dhe mbështetësit e tij e quajnë një gjë të tillë, akt turpi dhe paniku me qëllim shndërrimin e PD në bunkerin e tij privat. “Deputeti Lulzim Brava e nisi Vitin e Ri me avazin e vjetër të izolimit. Pasi izoloi veten nga 4446 delegatë dhe 43 385 anëtarë që firmosën shkarkimin e tij ai ka vendosur në prag të protestës paqësore të demokratëve ta kthejë shtëpinë e tyre në bunkerin e vetmisë dhe pazareve të tij. Kështu, në një akt turpi dhe paniku të denjë vetëm për një apartçik të marrë peng ai ndërron brava dhe po vendos dyer të blinduara për të shndërruar shtëpinë e demokratëve, selinë e Partisë Demokratike, në bunkerin e tij privat”, - thuhet në reagim. Komisioni i Rithemelimit shton se Basha nuk ka shans që nëpërmjet, dyerve të blinduara, shulave dhe bravave të mbajë peng vullnetin e demokratëve. “Me këtë rast i kujtojmë Lulzim Bravës që mendon se me dyer dhe brava do të mposhtë shumicën dhe pluralizmin në Shqipëri se ata që shembën regjimin më gjakatar në ’90-ën nuk do të lejojnë kurrë asnjë derë brave, hekur apo shul të mbajë peng vullnetin e tyre të shprehur përmes votës së lirë. PD ka lindur si shtëpi e lirisë dhe e tillë do të vijojë të mbetet, kurse Lulzim Pengu së bashku me pengmarrësin e tij do të kenë fatin e atyre që bunkerizuan Shqipërinë”, - shprehet Komisioni i Rithemelimit të PD-së. Berisha dhe grupimi i tij i kanë lënë afat Bashës që të largohet nga zyra e kryetarit deri në 5 janar, në të kundërt do të ketë një protestë masive në selinë blu në 8 janar për të marrë institucionin.