Sot nxënësit rikthehen në shkolla, ministrja Kushi apelon: Respektoni masat anti-COVID!
"Mësimi në prezencë fizike kërkon përgjegjësinë e të gjithëve"
Sot nxënësit e arsimit parauniversitar do të rikthehen në shkolla pas pushimeve për festat e fundvitit. Ministrja e Arsimit, Evis Kushi, nëpërmjet një statusi në "Facebook", u ka bërë apel nxënësve dhe mësuesve që të tregojnë kujdes në zbatimin e masave anti-COVID. "Të dashur nxënës, shpresoj të keni kaluar festa e pushime të gëzuara, e të keni mbledhur plot energji që nesër t'u riktheheni shkollave plot dëshirë e pasion për të mësuar më shumë. Rikthimi në shkollë ju bën bashkë me shoqet, shokët, mësuesit, të kaloni çaste të bukura por edhe të mbështesni më shumë njëri-tjetrin. Ndërkohë, dua t'ju kujtoj edhe një herë që të kemi kujdes të shtuar për higjienën dhe të gjitha masat kundër pandemisë. Shkollat e hapura dhe mësimi në prezencë fizike kërkon vëmendjen dhe përgjegjësinë e të gjithëve bashkë. Ju uroj shumë suksese dhe vit të mbarë", shkruan Kushi.
Vaksinimi është i hapur edhe për fëmijët +12 vjeç me probleme të sistemit imunitar, me rekomandim nga mjeku. Ministria e Shëndetësisë apelon të gjithë +18 vjeç që kanë kaluar 6 muaj nga kryerja e dozës së dytë të drejtohen në qendrat shëndetësore ose pikat e vaksinimit të përqendruar për t'u vaksinuar me dozën e tretë përforcuese. MSHMS ju kujton se respektimi i protokolleve anti-COVID është domosdoshmëri për mbrojtjen e shëndetit.
Shmangni grumbullimet dhe ajrosni ambientet ku qëndroni, për të kufizuar përhapjen e COVID-19. Kujtojmë qytetarët se vendosja e maskës është e detyrueshme në çdo ambient të mbyllur. Nëse dyshoni se jeni të prekur nga COVID-19 apo keni shenja të sëmundjes, izolohuni menjëherë dhe kontaktoni me mjekun tuaj të familjes për t'u testuar sa më parë ose telefononi Urgjencën Kombëtare në numrin unik 127", - apeloi Ministria e Shëndetësisë.