31-vjetori, Berisha: “RD”, zëdhënëse e revolucionit demokratik e antikomunist të ‘90-ës
Ish-kryeministri Sali Berisha kujtoi dje 31-vjetorin e gazetës Rilindja Demokratike. Ai përmendi se RD lindi me një mision të madh: si zë i të vërtetës në mbretërinë e mashtrimit, si rreze dritë në hapësirën e errësirës gjysmë shekullore, si zëdhënëse e fjalës së lirë, anticensurës, por edhe e revolucionit demokratik antikomunist të viteve 1990, si zëdhënëse e interesit dhe çështjes kombëtare gjer atëherë të tradhtuar, si themeluese e shtypit të lirë, mësonjëtore e tij. “Numrin e saj të parë e pritëm si në ekstazë, në një natë të bardhë, pothuaj si një mesazh gjysmë hyjnor. Ky numër hapej me titujt kushtuar fjalës së lirë, interesit kombëtar si ylli polar i PD, tregut të lirë dhe kronikat e lëvizjes studentore të atyre ditëve që ndanë epokat si dhe veprimtaritë në Tiranë dhe rrethe të PD. Gazeta që në numrat e parë përballoi me sukses armiqësinë e egër të partisë terroriste, nomenklaturës dhe organit të saj ZP. Duke qëndruar zëdhënëse e revolucionit demokratik e antikomunist të viteve ‘90 ajo iu rezistoi, gjithashtu, presioneve të pamerituara partiake për të qëndruar besnike e misionit të saj kryesor, zëdhënëse e fjalës së lirë, zëdhënëse e të vërtetës. Ajo me gjithë presionin dhe përpjekjet e muajve të fundit për t’i mbyllur gojën dhe vënë bravë dhe asaj, vjen sot në 31-vjetorin e saj përsëri si organ i të vërtetës, transparencës, antimafjes që përballet me vendosmëri dhe guxim me pushtetin më të korruptuar, më të inkriminuar në Europë me qeverinë e tij organizatë e vërtetë kriminale. Me këtë rast le të shprehim nderimin tonë më të madh, mirënjohjen time më të thellë ndaj të gjithë atyre qe themeluan, formuan dhe drejtuan e drejtojnë dhe sot RD si organ i të vërtetave dhe vlerave të mëdha të fjalës dhe mendimit të lirë”, - shprehet Berisha.