Berisha: Përzënia e “RD”-së nga zyrat, akt urrejtjeje i Lul Bravës, këtë gjë s’e bëri as Ramiz Alia
Ish-kryeministri Sali Berisha denoncoi dje se përzënia e gazetës “Rilindja Demokratike” nga zyrat që ishin në selinë blu është një akt urrejtje i Lul Bravës, ndaj fjalës së lirë! “Në 30-vjetorin e RDsë, Peng Basha me urdhër të pengmarrësit të tij Edvin Rama, në një akt intolerance dhe urrejtje për fjalën e lirë përzuri me dhunë nga zyrat e veta në selinë e PD-së gazetën ‘Rilindja Demokratike’, gazetarët e saj. Ky akt i shëmtuar antidemokratik erdhi si rezultat i qëndrimeve dinjitoze dhe në mbrojtje të lirisë së shprehjes të RD-së. Gazetarët dhe kryeredaktori i saj, Bledi Kasmi, në kulmin e krizës që kaloi PD-ja dëshmuan para demokratëve dhe mbarë shqiptarëve se ‘RD’-ja nuk ishte gazetë e Sali Berishës, as edhe e Lulzim Bravës, por kishte mbetur besnike e misionit të saj të madh për të cilin lindi, zëdhënëse e fjalës së lirë e së vërtetës, anticensurës, mendimit të pavarur intelektual, transparencës së guximshme të krimeve të narkoshtetit interesit kombëtar”, tha Berisha. Ai shkruan se këtë veprim për nxjerrjen jashtë të gazetareve të “Rilindja Demokratike” nuk e ka bërë as diktatori Ramiz Alia as dhe rebelët komunistë që erdhën në pushtet me flakë dhe tym në vitin 1997. “Duke dënuar me ashpërsinë më të madhe këtë dhunim të pashembullt të fjalës së lirë, gazetarëve dhe gazetës ‘Rilindja Demokratike’ në 31-vjetorin e tyre, ju bëj thirrje shoqatave të gazetarëve të vendit dhe të huaja si dhe institucioneve ndërkombëtare, zyrave të OKB-së, OSBE-së, KE-së, PEsë që merren me lirinë e mediave të dënojnë këtë akt të pashembullt banditesk ndaj mediave të deputetit peng të qeverisë Lulzim Brava”, deklaroi Berisha.