Rama, bashkëbisedim me demokratët? PD: Kryeministër vulgar! Salianji: Me shfaqje banale s’e mbulon qeverisjen me kriminelë
Një ditë pas protestës, situata në selinë e Partisë Demokra tike është e qetë. Paraditen e djeshme asnjë prej zyrtarëve të lartë të PD-së nuk ishte në seli, përveç sekretarit të përgjithshëm, Gazment Bardhi. Gjatë gjithë ditës së djeshme u punua për pastrimin e godinës, ndërkohë që pamjet e shkatërrimit janë ende të dukshme. Dy ditë më parë Lulzim Basha e bëri të qartë se protesta e 8 janarit shënoi ndarjen përfundimtare me Sali Berishën. Sipas Bashës, 8 janari shënoi ditën e fundit në politikë të Berishës, duke hedhur poshtë çdo mundësi për negociatë me Komisionin e Rithemelimit. Nga ana tjetër, Sali Berisha deklaroi pas protestës se godina nga selia e PD-së u shndërrua në bunkerin personal të Lulzim Bashës. Berisha paralajmëroi se shumë shpejt Komisioni i Rithemelimit do t’i kundërpërgjigjet Lulzim Bashës. Deputetja e PD-së Flutura Açka, e cilësoi si mjerim, daljen në media të kryeministrit Edi Rama si i shqetësuar për demokratët. Açka shkruan se “shqetësimi i sotëm i shqiptarëve nuk është ‘dhëmbi i prishur’ i demokratëve, por sarkoma e qeverisjes”. Ajo pyet Ramën se kur do të bashkëbisedojë me patronazhistët. “Mjerim, ke kohë që nuk je më lajm dhe kërkon të bëhesh lajm me demokratët. Po u përgjigjet pyetjeve të përgatitura nga zyra e Gebellsit të tij në emër të demokratëve. Shqetësimi i sotëm i shqiptarëve nuk është ‘dhëmbi i prishur’ i demokratëve, por sarkoma e qeverisjes tënde. Faturën me emrin tënd dhe qeverisë tënde e dinë mirë shqiptarët. Dhe sa për fjalime që po bën nga kali i shaluar, me fjalorin tënd vulgar permanent, dikush është mirë të ta thotë qartë: demokratëve nuk iu ha fare Edi për Edin, madje as shqiptarëve. Sepse rri krekosur në pushtet me vota të grabitura si në asnjë demokraci të vërtetë në botë. Meqë ra fjala, me patronazhistës kur do të bashkëbisedosh?”, - shprehet deputetja e PD-së. Kurse në një lidhje për “Neës 24”, qëndrimin e Ramës për protestën, i cili bashkëbisedoi me demokratët, deputetja e komenton atë si “kryeministër vulgar”. “Meqenëse kryeministri ynë i dashur e ka zanat të jetë vulgar dhe të prishë gjuhën, jam e detyruar edhe unë ta prish disi gjuhën për t’iu përgjigjur këtij njeriu që nuk lë rast pa bërë ato batutat e tij bajate dhe vulgare. Ai e ka përsëritur shpesh në retorikën e tij ‘dhëmbi i prishur’ i PD-së, ju e keni dëgjuar apo jo?! Unë e di që shqiptarët e sotëm nuk kanë problem ‘dhëmbin e prishur’ të PD-së, e kanë problem sarkomën, (lloj kanceri që fillon në inde si kockat ose muskujt) që Edi Rama iu ka vënë në shpinë shqiptarëve. Ai është halli sot i shqiptarëve, prandaj sa më shpejt të bashkohet PD-ja, sa më shpejt këto gjëra të shoshiten mes dy kampeve, po them kampeve tani meqenëse janë vendosur kampet përballë njeri-tjetrit, aq më shpejt do t’i vijë fundi Edi Ramës. Dhe sa për Edi Ramën, po them atë batutën po aq vulgare sa ç’e ka thënë ai dhe nuk e kam turp fare, se nuk më bën fare për Edi Ramën, ky njeri që bën vetëm sehir dhe harron se kush është dhe çfarë i ka bërë kësaj Shqipërie sot, shqiptarëve të sotëm nuk iu fare Edi për Edi Ramën”, deklaroi deputetja Açka për “News 24”. Edhe deputeti i PD-së, Ervin Salianji, iu përgjigj kryeministrit Rama duke u shprehur se nuk e mbulon bashkëqeverisjen me kriminelë dhe trafikantë. Salianji publikoi dje një video me artikuj në mediat ndërkombëtare, duke u shprehur se Rama e ka kthyer Shqipërinë në Kolumbi të Europës. “Kjo është fytyra e Edi Ramës, imazhi i tij ndërkombëtar. Mënyra se si ka drejtuar vendin, me kriminelë, trafikantë, duke vjedhur paratë e shqiptarëve dhe duke e kthyer Shqipërinë në Kolumbi të Europës. Me shfaqje banale nuk fsheh dot korrupsionin dhe kriminalizimin e shtetit”, - shprehet Salianji.