Nxjerrja e pagave të 650 mijë qytetarëve, lirohen 4 të arrestuarit
Specialistja e IT-së, para hetuesve: Të dhënat ia dhashë në mirëbesim Andi Agarajt Gjykata i lë në arrest shtëpie dhe detyrim paraqitje
personat e arrestuar me urdhër të Prokurorisë së Tiranës për skandalin e nxjerrjes së pagave të mbi 650 mijë qytetarëve u liruan dje nga gjykata. Në bazë të një vendimi të gjykatësit Artan Gjermeni të marrë të shtunën, Eni Qirjako, eksperte e IT-së në Drejtorinë e Tatimeve do të qëndrojë në masën detyrim paraqitje. Për 3 të arrestuarit e tjerë, ekspertin e IT-së te Tatimet, Andi Agaraj dhe dy përmbaruesit privatë Klodian Sota dhe Endri Ikonomi është dhënë masa e arrestit në shtëpi. Organi i akuzës kërkoi masën “detyrim paraqitje” dhe “pezullim të ushtrimit të detyrës” për eksperten e IT-së, Eni Qirjako gjë që u pranua nga gjykata. Për 3 të tjerët akuza kërkoi masën arrest me burg, por gjykata i la në arrest shtëpie. Këta persona u arrestuan në 7 janar të akuzuar për “Shpërdorim detyre” dhe “Korrupsion”. Sipas prokurorisë, Eni Qirjako, specialiste e IT-së pranë AKSHI-t, përgjegjëse për të dhënat e sektorit të Tatimeve, i ka kaluar në 6 raste kolegut të saj Andi Agaraj të gjitha të dhënat e pagave për të cilat ajo kishte akses në server. Agaraj ia ka shitur të dhënat për 20 mijë lekë shtetasit Klodian Sota, ndërsa ky i fundit ia ka shitur këtë material Endri Ikonomit për 30 mijë lekë. Sota është menaxher pranë kompanisë “Smart Collection”, ndërsa Ikonomi rezulton të jetë administrator i kompanisë “Credit 2 All”, në pronësi të biznesmenit rus, Oleg Viktorovich Boyko. Sipas prokurorisë, rrjedhja e listës së pagave dhe targave mund të ketë lidhje edhe me listat e patronazhistëve në mënyrën e gjenerimit të të dhënave.
DËSHMIA
Specialistja e IT-së, e punësuar në AKSH dhe që ushtronte detyrën në Drejtorinë e Përgjithshme të Tatimeve, Eni Qirjako, tregoi para hetuesive se 6 databazat me listëpagesat e mbi 690 mijë qytetarëve ia ka dhënë kolegut të saj, Andi
Agaraj. Me dëshminë e saj, ajo është bërë bashkëpunëtore e drejtësisë për të zbardhur skemën e përdorur për publikimin e të dhënave personale të qytetarëve. Sipas Qirjakos, kolegu i kishte thënë që i duheshin për një punë studimore, pasi po bënte temën e diplomës master. Ajo po ashtu ka treguar se nuk e dinte që kolegu i saj do ta keqpërdorte dhe ia ka dhënë në mirëbesim. Po ashtu, e reja ka treguar se kur janë publikuar të dhënat në media, Agaraj i ka kërkuar që të formatojë kompjuterin, por ajo ka refuzuar që ta bëjë. Në dosjen hetimore thuhet se Andi Agaraj ka treguar emrin e Klodian Sotës, të cilit ia ka shitur të dhënat dhe ka kërkuar masë më të butë sigurie. Ndërsa përmbaruesit privat Endri Ikonomi ka pretenduar se i ka blerë me faturë tatimore të dhënat nga Klodian Sota, pasi i duheshin për biznesin e tij, por se nuk e dinte burimin e tyre. Gjatë leximit të provave prokuroria ka kërkuar masën e sigurimit “detyrim paraqitje” për Qirjakon dhe “arrest në burg” për tre të tjerët. Në bazë të dosjes hetimore rezulton se organi i akuzës kishte vënë nën përgjim rreth 30 persona, por që nuk kanë përfituar detaje të reja. E gjithë skema është zbardhur nga deklarimet e personave të dyshuar. Gjykata pasi ka dëgjuar pretendimet e palëve, ka liruar nga qelia 4 të dyshuarit, konkretisht për Eni Qirjakon është caktuar detyrim paraqitje ndërsa për specialistin e ITsë, Andi Agaraj dhe dy përmbaruesit privatë, Klodian Sota dhe Endri Ikonomi është vendosur “arrest në shtëpi”. Prokuroria vijon hetimet për të zbuluar nëse ka edhe persona të tjerë të përfshirë në skandalin e publikimit të të dhënave personale të mbi 690 mijë qytetarëve. Po ashtu, hetime intensive po kryhen edhe për databazën e targave të automjeteve.