Si u mor vendimi për Berishën, zbardhen debatet në kryesinë e PD-së: S’ka kohë, të veprojmë!

Kryesia e PD-së vendosi dje në orët e para të mëngjesit përjashtimin e ish-kryetarit të saj, Sali Berisha. Së bashku me të janë përjashtuar edhe 7 anëtarë të Komisionit të Rithemelimit, mes të cilëve, ish-presidenti Bujar Nishani dhe ish-sekretari i përgjithshëm i PD-së, Arben Ristani. Mbledhja e kryesisë nisi në orën 19:00 dhe pati një ndërprerje rreth orës 21:00, ku disa nga anëtarët e kryesisë morën pjesë në emisionet televizive ku u diskutua mbi protestën e dhunshme të 8 janarit. Pas rifillimit të mbledhjes, të gjithë anëtarët e kryesisë mbështetën propozimin për përjashtimin e Berishës dhe grupit të tij të afërt. Mbledhja e kryesisë u mbyll pas orës 3 të mëngjesit të djeshëm. Burimet bëjnë të ditur se diskutimi më i fortë ka qenë ai i Grida Dumës, e cila ka kritikuar faktin që linja zyrtare e partisë nuk ia sqaroi bazës përse Berisha u shpall “non grata”. Ajo kritikoi gjithashtu edhe blindimin e selisë së PD-së, taksa kërkoi që në mënyrë simbolike godina të jetë e hapur dhe e aksesueshme për të gjithë. Duma deklaroi se me aktet e dhunës dhe kaosit në protestën para selisë blu, Sali Berisha tregoi se ka mbetur ai i vitit 1997. Sipas saj, më 8 janar Berisha mund të kishte sakrifikuar jetë njerëzish, ndërsa shtoi se gjakderdhja u evitua vetëm falë ndërhyrjes së policisë. Mësohet se Ervin Salianji ka propozuar që disa prej zyrtarëve të partisë t’u jepet një tjetër mundësi që të reflektojnë dhe të distancohen nga dhuna e 8 janarit, teksa ishte në të njëjtën linjë me Grida Dumën, për daljen në bazë dhe diskutimin me anëtarësinë për vendimet e partisë. Një nga njerëzit që përjetoi ngjarjet e 8 janarit brenda selisë së PD-së ka qenë dhe deputeti Agron Gjekmarkaj. E pikërisht dhuna e shfaqur në protestën e thirrur nga Sali Berisha ka bërë që Gjekmarkaj të kërkojë një riformatim të PD-së. Në mbledhjen e kryesisë, Gjekmarkaj ka deklaruar se ata që drejtuan turmën më 8 janar nuk i llogaritën as për miq e as për kolegë ata brenda dhe se nuk mund të bashkëjetojë dot me ta në një parti. Në mbledhjen me dyer të mbyllura të kryesisë së PD-së, deputeti i PD-së, Kreshnik Çollaku, bëri deklaratën e fortë kur tha se në protestë kishte listë me 4 deputetë që do linçoheshin fizikisht, pas futjes në godinë të grupit të dhunuesve. “Unë jam informuar që aty ka qarkulluar një listë me disa emra të veçantë deputetësh, që do të linçoheshin fizikisht pas futjes në godinë të grupit të dhunuesve. Disa agresorë kishin emrat e katër deputetëve për t’i keqtrajtuar. Ashtu siç ka ndodhur në Mal të Zi, ku Rusia krijon destabilitet, po ndodh edhe në Shqipëri. Këtu ka ndërhyrë inteligjenca, tani NATO që në vende të ndryshme, me shkaqe të ndryshme kanë synim për të destabilizuar Ballkanin”, është shprehur Çollaku. Endri Hasa deklaroi në mbledhjen e kryesisë se nuk mund të ketë vend më në PD për atë që erdhën për gjak në 8 janar para selisë blu. “S’mund të negocioj uljen në tryezë me ata që erdhën në PD për të na vrarë!”, u shpreh mes të tjerash ish-deputeti Endri Hasa, mbështetës i linjës së Bashës në PD. “S’mund të negocioj uljen në tryezë me ata që erdhën në PD për të na vrarë!”, u shpreh mes të tjerash ish-deputeti Endri Hasa, mbështetës i linjës së Bashës në PD.