Protesta e 8 janarit, PD-ja raport për ambasadat dhe KE-në
PD-ja u dërgon raportin e detajuar selive diplomatike, përmendet incidenti i Bejkos “Berisha sulmoi brutalisht, donte të largonte me forcë Bashën”
Lulzim Basha u ka dër guar një raport të de tajuar ambasadave të huaja në vendin tonë dhe Komisionit Europian për protestën e 8 janarit. Në raportin 8- faqësh, PD-ja përshkruan orë pas ore atë që ndodhi në selinë e blu gjatë protestës të 8 janarit, duke e shoqëruar edhe me foto të protestës në seli, militantë me vare e çekiçë në duar, ndërsa përgjegjësin kryesor dhe udhëzuesin e të gjithë kësaj dhune, PD-ja bën fajtor Sali Berishën. Në këtë raport theksohet çdo akt dhune që nga përdorimi i çekiçëve e deri te hedhja e gurëve nga mbështetësit e Berishës në selinë blu. Për këto akte PD-ja bën fajtore Sali Berishën. Në raport përmendet edhe incidenti i Roland Bejkos dhe marrja në mbrojtje nga Garda e deputetit Enkelejd Alibeaj, pasi ishte kërcënuar me jetë. Megjithatë, në asnjë rresht të dokumentit të PD-së nuk përmendet fortifikimi dhe dyert e blinduara që iu bë godinës. Në raport thuhet se: “Një dhunë e paprecedentë ka ndodhur të shtunën në tubimin e thirrur nga deputeti Sali Berisha kundër PD-së, me synimin për të thyer brenda selisë së PD-së dhe për largimin me forcë të kryetarit Lulzim Basha. Protesta u thirr kundër kryetarit të Partisë Demokratike, Lulzim Basha, pas vendimeve të tij për përjashtimin e ish-kryetarit Sali Berisha, i shpallur “non grata” nga SHBA-të për korrupsion dhe shkelje të demokracisë”. “Ora 11.00 – vetëm një orë para nisjes zyrtare të protestës së thirrur nga Berisha, disa prej mbështetësve të tij kanë sulmuar dhe sulmuar fizikisht dhe verbalisht sekretarin e PD-së për Zhvillimin Vendor, z. Roland Bejko, në prani të të mediave dhe kamerave. Gjithashtu, nënkryetari i PD-së deputeti, Enkelejd Alibeaj, ishte vënë nën mbrojtjen e Gardës Kombëtare, pasi u sulmua dhe u kërcënua me jetë nga persona të mbledhur në protestën e thirrur nga Berisha. Ai ka reaguar në një postim në ‘Twitter’, duke dënuar rolin e Berishës në këtë tubim të dhunshëm, duke theksuar se ai është i gatshëm për akte dhune. Ai rithekson se ‘veprimi i Berishës po e vë PD-në përballë njëri-tjetrit, ndërsa ai tërhiqet përpara, gjë që tregon fytyrën e vërtetë të Berishës. Ai është i gatshëm të dëmtojë këdo që nuk e bën këtë dhe nuk mendon si ai’. Gazetarët e medias i fotografuan këto akte që në momentin kur njerëzit u vërsulën me forcë në hyrjen kryesore të selisë së PD-së, duke thyer dhe shkatërruar derën dhe xhamat”, - thuhet në raportin e PD-së. Ndërkohë, në raport thuhet se pas protestës, oficerët e policisë iniciuan ndalimin dhe shoqërimin e demokratëve në komisariat. “Pas mbylljes së konferencës për shtyp nga zoti Basha dhe kur përfaqësuesit e PD-së nisën të largoheshin nga selia e partisë, oficerët e policisë iniciuan sërish ndalimin dhe shoqërimin e tyre në komisariat. Ndër personat e ndaluar nga policia nuk kanë qenë vetëm përfaqësues të PD-së, deputetë, por edhe media e gazetarë. Reagimi i menjëhershëm ka ardhur nga sekretari i përgjithshëm,
Bardhi, i cili e dënoi këtë lëvizje të policisë dhe kërkoi shpjegime se pse përfaqësuesit e PD-së u morën për herë të dytë në pyetje, ndërkohë që kishin dëshmuar njëherë”, - thuhet në raport. Kujtojmë se dje kryesia e PD-së mori një tjetër veprim drastik duke përjashtuar ish-kryeministrin Sali Berisha dhe 8 anëtarëve të tjerë që ishin pjesë e Komisionit të Rithemelimit. Konkretisht bëhet fjalë për Bujar Nishanin, Flamur Nokën, Albana Vokshin, Edmond Spahon, Arben Ristanin, Rigels Muçollari, Klevis Balliun dhe Keltis Krujën.