Pezullimi, Paloka letër deputetëve: Mos u ktheni në mburojë të Bashës!
“Nuk më përjashtojnë dot”, Vokshi reagon pas vendimit të kryesisë së PD-së “Do të bëheni si ‘kërpërata’ dhe Jenisheri. Zgjidhni në cilin krah do të qëndroni”
Deputeti demokrat, Edi Paloka, iu drejtua dje me një apel kolegëve të tij të Partisë Demokratike, lidhur me situatën ku kjo parti ndodhet, ndërsa në orët e para të mëngjesit të sotëm, Lulzim Basha vendosi përjashtimin përgjithmonë nga PDja të ish-kryeministrit Sali Berisha dhe 7 anëtarëve të Komisionit të Rithemelimit, si pezullimin e 19 anëtarëve të tjerë të këtij komisioni. Paloka kërkon nga deputetët që t’i drejtojnë disa pyetje Lulzim Bashës, sepse ai nuk pranon në asnjë rrethanë të votëbesohet dhe pse ai po mbron me policinë e Ramës, karrigen e tij. “Pyeteni pse është gati të fshihet, të mbyllë e bunkerizojë selinë, por të mos votohet? Pse hedh miliona për të mbyllur me hekur shtëpinë e demokratëve e nuk pranon të votohet?! Pse ju kërkon ju deputetëve të PDsë të ktheheni në mburoja të gjalla për të? Pse është gati t’ju sakrifikojë ju e të helmojë demokratët me gazin e Ramës vetëm që të mos shkojë të votohet? Pse i duhet një vulë e disa zyra të uzurpuara nën mbrojtjen e policisë së Ramës, kur demokratët i ka përzënë?! Pyeteni se keni përgjegjësi, nuk jeni pupacët e tij”, shkruan Paloka. “Ai ju thotë se Berisha po përdor demokratët për hallet e tij, po në fakt ju përdor juve si kukulla e mburojë që të vazhdojë bizneset e tij me Ramën. Nuk mori Sali Berisha asnjë nga ne në telefon t’i lutej, apo ca më keq, të urdhëronte që t’i dilnim ‘në mbrojtje’ siç bën Basha me ju”, thekson Paloka. Ish-nënkryetari i PD-së publikoi edhe mesazhet e disa demokratëve, që sipas tij theksojnë se grupi aktual i PD-së do të “përfundojë si ish-deputetët, Majlinda Halilaj e njohur si ‘kërpërata’ dhe Selami Jenisheri”. “Do pranoni të bëheni më qesharakë se ‘kërpërata’ e Jenisheri në parlament (se edhe ata në fakt, deputetë të Lulit ishin)? Nuk po ju them rreshtohuni pas Berishës, por tregohuni
dinjitozë në qëndrimet tuaja, se jeni deputetë e përfaqësues. Kërkojini Lulit të pranojë minimalisht të gjykohet me votën e demokratëve, ai dhe kushdo tjetër. Të gjithë ne”, thekson Paloka. Edhe deputetja Albana Vokshi reagoi dje pas përjashtimit të saj përgjithmonë nga Partia Demokratike, vendim i marrë ky nga Kryesia e PD-së ditën e djeshme. Ndërsa thekson se nuk mund ta përjashtojnë dot nga PD-ja, ata që
nuk kanë lidhje me partinë, ajo akuzon kryedemokratin Basha se e do selinë me çdo kusht vetëm për pasurimin e tij personal. “Nga PD-ja nuk më përjashtojnë dot ata që nuk kanë lidhje me PD-në. Nga PD-ja nuk më përjashton dot një grup uzurpatorësh, që PD-në e kanë mjet për pasurimin personal, ndaj e duan me çdo kusht. Ata nuk kanë lidhje as me demokratët, as me demokracinë. I vetmi organ legjitim në Partinë
Demokratike, mandatuar nga Kuvendi Kombëtar i 11 dhjetor 2022, është Komisioni i Rithemelimit të PD-së, në të cilin unë jam anëtare. Lulzim Basha është shkarkuar me 4446 vota të delegatëve legjitimë të Kuvendit Kombëtar të PD-së, vendim ky i ratifikuar në mënyrë unanime nga rreth 44 mijë anëtarë të PD-së në referendumin e datës 18 dhjetor 2022. Në demokraci sovrani vendos”, - shprehet Vokshi.