Protesta, Rama: Basha i papërgjegjshëm, fortifikoi godinën
“Dy kufomat politike po kacafyten”, kryeministri: Gjendja në PD, për të qarë e për të qeshur! “Veç e veç, Basha e Berisha nuk kanë legjitimitet”
Rama dje nuk pranoi të komentojë përjash timin nga Partia Demokratike të Sali Berishës dhe një sërë figurash të tjera nga Lulzim Basha, por sipas tij ata janë njësoj, pasi po luftojnë për pushtet personal. Pas përfundimit të mbledhjes së Kryesisë së PS-së, kryeministri u pyet edhe për situatën e tensionuar në PD, duke iu referuar protestës së 8 janarit ku u shënuan incidente të dhunshme, por edhe shkarkimeve të fundit. Duke e cilësuar gjendjen aktuale të opozitës, dramatike, Rama theksoi se PD interesohet vetëm për zgjidhjen e problemeve të individëve të caktuar. “Kjo është për të qarë dhe për të qeshur, por unë nuk mund të qaj për gjendjen dramatike ku është PD, por ndonjëherë edhe qeshim”, - deklaroi Rama. Kryeministri e quajti papërgjegjshmëri sjelljen e Lulzim Bashës, që sipas tij fortifikoi godinën e PD-së dhe nuk kërkoi mbrojtjen e selisë blu nga Policia e Shtetit. Nëse do të kishte bërë këtë, Rama tha se mund të ishte shmangur dhuna në protestën e së shtunës. “Policia e Shtetit ishte në sfidën e vet më të vështirë në këtyre 30 viteve, sepse kurrë ndonjëherë më parë nuk e ka pasur sfidën që të futet në oborrin e një partie për të ndarë dy palë që kacafyten dhe që mund të shkojnë deri në gjakderdhje. E ka trajtuar çështjen me një profesionalizëm, qetësi dhe kalkulim risku për t’u admiruar. Por gjithçka mund të evitohej, nuk kishte nevojë për ta fortifikuar Partinë Demokratike, mund të lajmërohej Policia e Shtetit dhe të thirrej për ta mbrojtur dhe nuk do kishte pasur asgjë të tillë, as dhunë dhe as kundërpërgjigje. Faktikisht Lulzim Basha disa herë në mënyrë të përsëritur në vijim bëri atë që nuk mund ta bëjë kurrë dikush që ka sensin e përgjegjësisë ndaj njerëzve, ndaj institucionit që përfaqëson, ndaj ligjeve të vendit, duke folur për fortifikime dhe duke bërë fortifikime, në vend se qartësisht të fliste për nevojën që ai institucion të mbrohej nga Policia e Shtetit. Dhe duke e përjashtuar Policinë dhe sjelljet, reagimet para dhe pas me Policisë janë të ngjashme si dy pika ujë të dy kufomave politike dhe prandaj po ju them që është e njëjta mbetjeje e ndarë përgjysmë s’ke ça zgjedh se është njësoj”, - theksoi Edi Rama. Kur u pyet nëse mazhoranca do të bashkëpunojë me opozitën për zgjatjen e afateve të vetingut apo për reforma të tjera që kërkojnë konsensusin e saj, kryeministri u shpreh se veç e veç, Basha e Berisha nuk kanë legjitimitet. “Është gjithçka për t’u parë, sepse nuk dimë më kush është kush në këtë histori dhe kush përfaqëson kë. Sigurisht të dy këta përfaqësues të mbetur nga e shkuara në këmbë nuk kanë asnjë legjitimitet veç e veç. Sigurisht që deputetët e PD, pavarësisht të njërit apo tjetrit, janë legjitimë, sepse janë aty me votën e popullit dhe natyrisht për sa kohë ne do të shohim se ka shans për bashkëpunim dhe bashkërendim të çfarëdolloj natyre ne jemi aty për ta bërë këtë. Por situata është jashtëzakonisht e vështirë për momentin dhe do të shikojmë si do zhvillohet…
Uroj që të jetë një proces që shkon drejt një zgjidhje paqësore, uroj që dhuna që pamë dhe fortifikimet nga ana tjetër, që janë dy anë të së njëjtën medalje, të mbeten pas”, - theksoi ai. Sa i përket reagimit të Policisë së Shtetit në protestën e së shtunës, Rama tha se ajo ishte sfida më e vështirë e saj në këto 30 vjet, sfidë të cilën e përballoi tha kryeministri me një qetësi për t’u admiruar.