PS mbledh Kongresin më 29 janar. Rama: Ripërtëritjet, karakteristikë e jona
Kryesia e Partisë Socialiste u mblodh dje në drejtimin e Kryetarit Edi Rama për të miratuar projektvendimin për mbledhjen e Kongresit në datën 29 Janar. Në këtë mbledhje u paraqit dhe drafti paraprak me propozimet për ndryshime në Statutin e PSSH-së. Pas diskutimeve të zhvilluara nga anëtarët e kryesisë dhe propozimeve përkatëse, grupi i posaçëm i punës për statutin do të vazhdojë diskutimin në ditët e ardhshme për të hartuar dokumentin përfundimtar, i cili do t’i paraqitet për miratim delegatëve të Kongresit. Gjatë punimeve të Kongresit, paralelisht do të organizohet votëbesimi nga Asambleja Kombëtare për Sekretariatin Ekzekutiv të partisë. Në kryesi u diskutua, gjithashtu, për aktivitetin që do të zhvillohet në 15 janar në kuadër të 30-vjetorit të Forumit Rinor Eurosocialist Shqiptar. Në fokus të diskutimeve kanë qenë dy pika kyçe njoftoi Rama, riorganizimi tërësor i të gjithë rrjetit rinor të PS-së, por edhe Kongresi që sipas kreut të qeverisë do të drejtojë sfidat e përbashkëta të partisë dhe qeverisë për katër vitet e ardhshme. Duke iu përgjigjur edhe pyetjes së gazetarëve nëse PS po plaket, Rama tha se ripërtëritja, riorganizimet dhe fitoret kanë qenë gjithmonë një karakteristikë e PS. “Ne kemi diskutuar për dy aktivitete të rëndësishme në vijim, një aktivitet është në 15 janar, një aktivitet i rinisë socialiste dhe progresiste në funksion të një riorganizimi tërësor të të gjithë rrjetit rinor të PS, por edhe përtej PS në kuptimin, një rrjet aktivizmi, vullnetarizmi, qytetarie progresive në funksion të komunitetit në funksion të shoqërisë dhe sigurisht ku ne dëshirojmë që të ndërveprojmë me të rinjtë dhe t’u japim mundësinë që të kenë një mbështetje për çka ata mund të jenë të vlerësuar të bëjnë si qytetarë si aktivistë, si njerëz të interesuar përtej punëve të veta. Pastaj është ngjarja e Kongresit të PS që do të drejtojë sfidat e përbashkëta të partisë dhe qeverisë për katër vitet që vijnë. Të gjithë jemi duke u plakur, por në fund të ditës nuk ka rëndësi sa të shkruhet mosha në certifikatë, por se sa ndihesh. Gjithmonë ripërtëritja, gjithmonë riorganizimet, shkuarja përpara, fitoret kanë qenë një karakteristikë e jona”, - deklaroi Rama.