Firmoset marrëveshja për forcimin e sigurisë kibernetike
Kryeministri flet për skandalin me pagat: Sulmet, nga brenda prej personave të infiltruar Rama: Do të ngrihet një Qendër Kombëtare Sigurie
Marrëveshja për forcimin e sig urisë së sistemeve digjitale në vend u firmos dje mes qeverisë shqiptare dhe kompanisë së njohur amerikane, “Jones International”, drejtuar nga një personalitet i madh i ushtrisë dhe i politikës amerikane. Siguria kibernetike është sot fjala kyçe për shumë qeveri dhe subjekte private, ndaj qeveria shqiptare nënshkroi dje një marrëveshje në këtë fushë me kompaninë amerikane “Jones Internacional”. Kompania drejtohet nga një ish-gjeneral i marinës amerikane dhe ish-këshilltar në Shtëpinë e Bardhë për sigurinë kombëtare. Kjo marrëveshje do të forcojë sistemet digjitale, nga çdo sulm i brendshëm apo i jashtëm që do të tentojë të vjedhë të dhëna. “Do të punojmë me Shqipërinë për ta bërë më të sigurt në sigurinë kibernetike. Ka rreziqe të qarta dhe të dukshme. Puna që do të bëjmë do të jetë një shembull, për të parë se çfarë do të bëhet në fushën e sigurisë kibernetike. Suksesi që do të arrijmë do të jetë jo vetëm transformues, por do të sjellë vende pune dhe begati për Shqipërinë. Shqiptarët duhet të jenë përgjegjës për sigurinë e tyre”,-tha Jones. Duke u ndalur tek rrjedhja e të dhënave të shqiptarëve, kryeministri Rama theksoi se me sistemin e ri që do të krijohet rrjedhja e informacioneve do të jetë e gati e pamundur. “Ngjarja që ndodhi me listën e pagave na jep mësimin që nuk janë vetëm sulmet anonime kibernetike ndaj të cilave ne duhet të jemi të mbrojtur, por janë edhe sulmet nga brenda të personave të infiltruar, të paguar apo qoftë të papërgjegjshëm. Unë e vlerësoj shumë aspektin e marrëveshjes sonë për një hapësirë shumë të reduktuar për personat që bëjnë dëm. Rrjet mbrojtje digjitale do të vihet në dispozicion. Aftësia e cilido individi për ta penetruar sistemin do të jetë shumë e kufizuar pasi do të ketë shumë mure mbrojtëse. Është një lajm shumë i mirë edhe për ata që u lënduan padrejtësisht nga dalja e listës së pagave. Ajo e keqe nuk erdhi vetëm për keq, por të gjithë shqiptarët panë me sytë e tyre një problem siç është ai i deklarimit të pagave apo edhe u përjetua një sulm në sistem”, - tha Rama. Sipas tij objektivi i qeverisë është që të hapim një qendër sigurie kibernetike çka do të ishte një vlerë e shtuar për aleancën euroatlantike, NATO. “Ne e vlerësojmë shumë bashkëpunimin me ju për ngritjen e një Qendre të Mbrojtjes Kibernitike që të jetë në shërbim të ushtrisë tonë, por edhe të gjithë aspekteve që kanë të bëjnë me pjesën civile të shoqërisë. Është një sfidë e madhe, por duke pasur dhe ndihmën dhe kurajon tuaj, ne do t’ia dalim të kemi një Qendër Kombëtare Sigurie, duke dhënë edhe shërbime përtej kufijve të Republikës së Shqipërisë”, - deklaroi Rama.