“Miku ynë më i mirë”, politika shqiptare reagon për vdekjen e David Sasoli
Politika shqiptare reagoi dje për ndarjen nga jeta të Presidentit të Parlamentit Europian. “Çfarë trishtimi! Miku ynë i mirë, Presidenti i Parlamentit Europian, David Sasoli, një europian i paepur, një italian krenar, një avokat i zjarrtë i Shqipërisë, gazetar i shquar dhe më pas politikan i respektuar nga të gjithë, ndërroi jetë befasisht duke lënë pas një boshllëk të ndjeshëm tek kushdo pati nderin e kënaqësinë ta njihte. Addio caro David, riposa in pace”. Me këto fjalë kryeministri Edi Rama shprehu ngushëllimet e tij për ndarjen e parakohshme nga jeta të presidentit të PE, David Sasoli. Presidenti Ilir Meta u shpreh i hidhëruar nga humbja e papritur e Presidentit të Parlamentit Europian. “I hidhëruar nga humbja e papritur e një europianisti të shquar dhe mbështetësi të palodhur të zgjerimit të BE drejt Ballkanit Perëndimor dhe integrimit të Shqipërisë, Presidentit të Parlamentit Europian, David Sassoli. Ngushëllime për familjen e Tij dhe institucionet europiane!”, - shprehet Meta. Mik të shqiptarëve dhe mbështetës të aspiratës së Shqipërisë për integrimin europian, e quan Lulzim Basha Sasolin, teksa shpreh ngushëllimet për humbjen e tij. “Thellësisht i trishtuar për ndarjen nga jeta të David Sasolit, Presidentit të Parlamentit Europian, miku i mirë i shqiptarëve dhe mbështetës i sinqertë i aspiratës tonë kombëtare për integrimin europian. Ngushëllimet më të ndjera familjes, miqve dhe bashkëpunëtorëve të tij për këtë humbje pikëlluese. U prehtë në paqe!”- shprehet Basha. Edhe kryetarja e Kuvendit, Lindita Nikolla, shprehu ngushëllimet e saj.