Grupi i PD-së bën kërkesë për herë të tretë për komision hetimor për investimet strategjike! Zhupa tërheq firmën

Grupi parlamentar i Partisë Demokratike ka depozituar sërish kërkesën për ngritjen e Komisionit për Investimet Strategjike. 35 firma deputetësh janë mbledhur, ndërsa mes tyre shihet që ka firmosur edhe ish-kreu i PD-së, Lulzim Basha. Mazhoranca socialiste rrëzoi të enjten kërkesën e deputetëve të opozitës për ngritjen e komisionit hetimor për të kontrolluar mënyrën sesi qeveria ka zbatuar ligjin për investimet strategjike. Përsëritja e kërkesës u bë pasi Agron Duka tërhoqi firmën pak ditë më parë, ndërsa në vend të tij për ngritjen e komisionit firmosën Enkelejd Alibeaj dhe Lulzim Basha, të cilët sipas argumentimeve të demokratëve, për shkak të axhendës nuk kishin mundur të firmosnin. Sipas ligjit, për ngritjen e një komisioni hetimor duhen të paktën 35 firma deputetësh. PD-ja thotë se ky komision do të hetojë të gjitha investimet e mëdha, që sipas tyre, u janë dhënë miqve të Ramës. Deputeti Gazment Bardhi tha nga ana tjetër se 36 deputetë kanë shprehur vullnetin e tyre për ngritjen e komisionit Hetimor dhe se tërheqja e një deputeti nuk e zhbën vullnetin e nismëtarëve të tjerë. Bardhi akuzoi mazhorancën se po nxjerr justifikime të kota, për të penguar hetimin dhe transparencën me abuzimet që qeveria po bën me pronat publike. “Ta harroni se mund të bllokoni një komision hetimor të kërkuar nga opozita konfrom ligjit dhe kushtetutës. Dilni zbuluar se me atë ligj që është zbatuar, pasi miq dhe familjarë tuajt kanë përfituar pasuri publike. Doni apo nuk doni ju opozita do ta bëjë transparencën e plotë për sa u përket investimeve strategjike”, – tha Bardhi.