I doli emri në përgjimet e SPAK-ut, mjeku Aurel Vula thyen heshtjen: Nuk kam lëshuar asnjë certifikatë apo epikrizë
TIRANË - Mjeku pediatar Aurel Vula ka reaguar për herë të parë në lidhje me përfshirjen e emrit të tij në hetimet e Prokurorisë së Posaçme dhe antimafies italiane si i përfshirë në skemën e trafikimit të ilaçeve dhe atë të të favorizimit të emigracionit të paligjshëm. Përmes një postimi në “Facebook”, mjeku deklaron se nuk ka lëshuar asnjëherë asnjë certifikatë apo epikrizë përcjellëse për pacientë të sugjeruar për shtrim në Itali. Ai sqaron gjithashtu se vizitat e tij në Itali lidhen me një problem familjar, pasi prindërit e bashkëshortes së tij kanë shkuar për kujdes mjekësor të specializuar në shtetin fqinj.
DEKLARATË PUBLIKE
“Duke marrë shkas nga njoftimi i bërë publik ditët e fundit nga autoritetet e drejtësisë italiane dëshiroj t’i bëj të ditur publikut shqiptar si vijon: Përfshirja e personit tim dhe familjarëve të mi në këtë njoftim nuk ka asnjë lidhje me realitetin e ndërtuar në media këto ditë. Për të qenë transparent, arsyet e vizitave tona familjare në Itali kanë qenë krejtësisht shëndetësore, të lidhura me rrezikimin e jetës së dy prindërve të bashkëshortes sime. Të dy këta të fundit u janë nënshtruar ndërhyrjeve të përsëritura kirurgjikale në zemër nga ku nëna e bashkëshortes humbi edhe jetën. Të gjitha këto ngjarje shëndetësore janë të dokumentuara nga autoritetet spitalore italiane. Nisur nga drama familjare për humbjen e njeriut të afërt, kjo ngjarje krijon sensitivitet të lartë për mua dhe familjarët e mi. Unë jam mjek pediatër dhe me përgjegjshmëri të plotë deklaroj se në asnjë moment:
-Nuk kam lëshuar asnjë certifikatë apo epikrizë përcjellëse për pacientë të sugjeruar për shtrim në Itali. -Nuk kam lëshuar asnjë dokument të çfarëdolloj natyre që të mund të lehtësonte procedurat e kalimit të kufirit të shtetasve shqiptarë gjatë kohës së pandemisë në shtetin italian.
U lutem të gjitha mediave të respektojnë integritetin tim profesional dhe moral, të cilin e kam ndërtuar me përkushtim dhe sakrifica në çdo kohë në ndihmë të çdo pacienti, pa lënë mënjanë kontributin gjatë periudhës së pandemisë si pasojë e SarsCov 19. Në të njëjtën kohë, falënderoj të gjithë dashamirësit të afërm, kolegë dhe pacientët e mi për mbështetjen e treguar me anë të mesazheve dhe telefonatave të panumërta gjatë këtyre ditëve”.