Arrestimi i Kasandër Nogës, policia: Ja pse u mbajt i fshehtë operacioni, belgët nuk donin që të bëhej mediatike

Në atentat, i përfshirë edhe një tjetër

TIRANË - Policia e Shtetit ka reaguar ditën e djeshme në lidhje me arrestimin e Kasandër Nogës, i cili akuzohet për atentatin ndaj Erion Hasabelliut. Ai u arrestua dje në Vjenë, ndërkohë që Policia e Shtetit nuk e bëri publik lajmin, pasi ruajtja e “sekretit” i ishte kërkuar nga autoritetet belge.

NJOFTIMI I POLICISË

Për të sqaruar në lidhje me arrestimin e Kasandër Nogës. Për çdo ngjarje, arrestim, operacion, sekuestrim, si dhe për dyshime për autorë ngjarjesh, edhe kur nuk ka bashkëpunim, përsëri mes Policisë së Shtetit dhe vendit ku ka ndodhur ngjarja apo operacioni ka letërkorrespondencë, fillimisht ka komunikime telefonike, pastaj komunikime zyrtare që vijnë me “email” dhe me shkresë zyrtare. Edhe në rastin e Kasandër Nogës, policia belge dyshon se njëri prej autorëve është Kasandër Noga, pasi në ngjarje dyshohet se janë të përfshirë 2 persona dhe njëri prej tyre akoma nuk është identifikuar. Menjëherë pas ngjarjes, ka ardhur kërkesë për bashkëpunim dhe policia shqiptare ka ushtruar disa kontrolle për gjetjen e këtij personi, por ka rezultuar se ky shtetas nuk kishte hyrë në Shqipëri. Dje pas shkëmbimit të informacionit mes policisë shqiptare dhe policisë belge për vendndodhjen në Austri të njërit prej autorëve të dyshuar, konkretisht të shtetasit Kasandër Noga, 45 vjeç nga Patosi i Fierit. Ky shtetas është arrestuar në Austri nga Policia belge, e cila po punon me Prokurorinë belge, për të zbardhur e dokumentuar me prova ligjore këtë ngjarje. Nuk e kemi bërë publike për shkak se Policia belge nuk ka dashur të bëhet mediatike, sepse operacioni vijon për kapjen e personit tjetër të përfshirë në këtë ngjarje.