Shoqata e Bankave, qeverisë: Pse nuk e luftoni ekonominë e parasë "cash"?
Shoqata Shqiptare e Bankave zhvilloi dje forumin "Digjitalizimi kundrejt parasë fizike". Në fjalën e tij, kryetari i Shoqatës së Bankave, Bledar Shella, tha se në vitet e fundit sektori ka kryer investime kolosale për automatizimin dhe digjitalizimin e shërbimeve dhe në veçanti të atyre të pagesave. Sipas tij, sektori bankar vetëm prej vitit 2017 ka investuar mbi 75 milionë Euro për këto shërbime. Shella tha se, së shpejti, do finalizohet plotësisht ofrimi i pagesave për shërbimet publike në "e-Albania". Megjithatë, ai theksoi se thellimi i digjitalizimit të pagesave kërkon edhe
INVESTIMET
mbështetje me ndryshime të domosdoshme ligjore. "Na vjen keq kur dëgjojmë se ne jemi mbrapa në digjitalizim. Ne ofrojmë të njëjtat standarde teknologjike si bankat e rajonit e më gjerë. Ne duam sa më pak veprime me para fizike dhe sa më pak njerëz në sportele. Por, digjitalizimi i shërbimeve financiare nuk është një mision që mund ta përmbushin të vetme bankat. Unë dua të shtroj disa pyetje. Pse në Shqipëri nuk ekziston detyrimi i tregtarëve për të pranuar pagesa alternative, përveç parasë 'cash'? Pse Shqipëria
nuk ka një vlerë tavan për pagesat konsumatore me para fizike? Në vendet e rajonit të tilla masa ekzistojnë", - tha Shella. Në përgjigje, zëvendëskryeministri Arben Ahmetaj tha se investimet e bankave janë shumë të vogla në raport me investimet që ka kryer qeveria. Ai kërkoi që bankat të përgatitin një draft në formën e strategjisë për të adresuar hapat e nevojshëm në drejtim të digjitalizimit të mëtejshëm të pagesave dhe për rritjen e përfshirjes financiare./ MONITOR